ZALEN, October 24, 2025: Senior Women’s Zonal Selection Committee for North East Zone-in November thlaa Senior Women’s Inter Zonal T20 Trophy 2025-26 khelh turah hmarchhak aiawha khel tur mi 15 a thlan zingah Mizo batter Lalrinfeli Pautu a tel a, team enkawltu zingah Mizo pahnih an tel bawk.

Board of Control for Cricket in India (BCCI)-in 2023-24 atanga a buatsaih, an hnuaia zone paruk awmte tana a buatsaih inelnaa hmarchhak team tana Mizoram atanga inlan tur, Felfeli hi Mizoram senior women’s team vice captain ni mek a ni.

Hnahthial nula, Felfeli hi Kulikawn Cricket Club-a khel lai niin Mizoram hmeichhe team-a opening batter a ni a, tun hnaia Senior Women’s T20 Trophy 2025-ah pawh khan Mizoram innghahna pakhat a ni.

Meghalaya Cricket Association President Nababrata Bhattacharjee-a kaihhruai selection committee hian Nagaland-a November 4-14 chhunga inelna neih tura player thlan nan hian 2024-25 season-a BCCI senior women’s tournament leh 2025-26 season kal meka an chet that dan atangin an teh a ni.

Felfeli bakah hian coaching staff zingah Lalruatsanga chu telin assistant coach tura ruat a ni a, Abhishag Vantluangpuii chu assistant physio-in a awm bawk ang.

Senior Women’s Inter Zonal T20 Trophy-ah hian tournament hmasa ber, 2023-24 khan Mizoram atangin Lalrinmawii Hangsing chu hmarchhak zone aiawh hian a lo khel tawh a ni.

North East Zone hian inelna tan niah West Zone an hmachhawn nghal ang a. Zone parukte hi an inkhelh kual vel hnuah a sang ber pahnihin November 14-ah final an khel dawn a ni.

North East Zone squad: Nabam Abhi, Nabam Yapu (Arunachal Pradesh), Kiran Bala Haorungbam, Ranjita Koijam (Manipur), Lalrinfeli Pautu (Mizoram), Riticia Nongbet, Debasmita Dutta, Solina Jaba (Meghalaya), Najmeen Khatun, Vipeni (Nagaland), Nandika Kumari, Pranita Chettri, Primula Chettri, Priyanka Kurmi, Samayita Pradhan (Sikkim)

Support staff: Deepali C Patkar (coach), Lalruatsanga (assistant coach), Sheril Lepcha (physio), Jasika Karam (trainer), Abhishag Vantluangpui (assistant physio), Baiahunlang Mylliemngap (manager)

NORTH EAST ZONE FIXTURE:

November 4 - North East vs West

November 6 - East vs North East

November 8 - Central vs North East

November 10 - North East vs South

November 12 - North East vs North