ZALEN July 8, 2026: Mizo tlangval hmeichhe khuaikhem case-a Shillong-a man anga thuthanga chu Shillong atanga thudawnna chuan thu belhchian dawn lo a nih thu ZALEN a hrilh a, an mi man nia sawi hi Mizoram lamah exam chawlh hmangin a awm mek tih a sawi.

Thu than dan chuan St. Edmunds College, Shillong-a English Department zirlai hi hmeichhe pariat aia tam a khuaikhem mai bakah social media-ah a vau zui thin niin sawi a ni. Shillong atanga thudawnna chuan mi vau thina puh mipa leh a vau nia sawi hmeichhe pahnih pawh hi Police Station-ah koh an ni tawh thu ZALEN a hrilh a, vauna video anga sawi pawh hi delete tir an ni, inremna neih tirin chhuah an ni a, FIR pawh thehluh a nih loh avangin manna chhan tur a awm lo a ti. 

Thu dawnna chuan Police Station-a an koh hmeichhia te hi Mizo an nih leh nih loh an la hre lo a, a dang an sawi zingah pawh hian Mizo an tel leh tel loh an hre chuang lo a ti. Man anga sawi zirlai hi Mizoram-ah tlanchhe haw anga social media lama sawi te pawh a awm a, mahse, he thil viral hma daih tawha exam chawlh hmanga haw a nih thu a sawi bawk.

The Shillong Times-in social media lama a tarlan dan chuan he mizo tlangval hian hmeichhe pariat (aia tam pawh a ni thei) a khuaikhem a, a khuaikhem te hi video hmangin a vau zui a, mahse, pakhat chu a rai tak avangin hriatchhuah a ni a, Police hnenah report a ni a, a video te chu delete tir tura tih ni a, amah hi jail-ah chuan dah a la ni lo. Dan anga taka hrem a nih theihna turin he thu hi thehdarh zel ang u. Tih lam hawiin post a ni.

Shillong atanga ZALEN thu dawnna chuan hemi chungchangah hian July 6, 2026 khan Mizo Students' Union Shillong General Headquarters chuan thuchhuah an siam a, he an thuchhuah siam hi dik tawk lo leh ngaihdan tlem a zawng belhin hetiang hian social media lamah hian a darh ta chiam niin an sawi.

Mizo Students' Union Shillong General Headquarters Circular:

  Nizan (July ni 5) zanlai bawr vel atanga thu darh, inkhuaikhemna thleng chungchangah Mizo Students' Union Shillong General Headquarters chuan kum tling lo nihna tarlang thei post leh thu chiang lo, inpuhmawhna chi hrang hrang, a tuartute tan pawha hmuh nuam lo tur post-te chu kan lo him tlan zawk nan share/post chhawng mai lo turin leh thuneitute ngaichang thiam turin kan inngen e.