ZALEN, Apr. 18, 2026: Electric Veng Branch YMA, Aizawl chuan sorkar kum liam taa UD&PA, AMC, Aizawl Smart City leh CYMA tangkawpin an buatsaih YMA Branch Faina Intihsiaknaa pathumna an nih chu Inrinni khan hnatlangin an lawm.

Lawmman dawn lawmna hnatlang hi AMC-in faina kawnga hma la tha chawimawina a lo pêk tawh, Lalliannguaua'n a hawng a ni.

Electric Veng YMA hian an huam chhungah meizial bung paihna hmun 100 chuangah an dah a, hnam dangte hnenah pawh faina chungchang ziakin an sem a, kohhran leh zirna in thlengin faina kawngah hma an la thin a ni.

YMA hruaitute chuan veng chhung tanrual avângin lawmman pathumna an lak theih thu an sawi a, kuminah pawh tan lak zel an tum thu leh naupang hnenah pawh uar zawka inzirna neih an tum tih an sawi. 

Faina hnatlang hawnnaah hian Local Council Chairman Samuel Vanlalpeka chuan YMA-in faina kawnga hma a lâknaah lawmthu a sawi a, a theihna apiangah tanpui zel an tum thu a sawi ve bawk.