ZALEN May 3, 2026: Home Minister K. Sapdanga hovin nimin zing khan Central YMA Hall-ah Central YMA hnuaia ruihhlo do pawl, Central Anti- Drugs Squad (CADS)-ten January 20, 2026 atanga May 1, 2026 chhunga ruihhlo chi hrang hrang an man tihralna hun hman a ni. 

Ruihhlo man tihralna hun hmanpuitu, home minister chuan ruihhlo do kawngah sawrkar leh tlawmngai pawl, a bik takin YMA thawhhona chu hlawhtling a tih thu leh thlamuanpuiawm a tih thu a sawi a. Sawrkar hna hmun sawma then a hmun kua hi tlawmngai pawlte zar a nih thu a sawi bawk.

Home minister chuan, “Ruihhlo do danah tharum nena bul tana counselling nena hma lak zui zel hi a tangkai a, hemi kawngah hian kohhran pawhin nasa takin hma an la mek a ni. Hetianga kan tanho zelna hian Mizo thalaite ruihhlo lakah a chhanchhuah ngei ka beisei a ni,” a ti.

Central YMA President R.Lalngheta pawhin thu sawiin ruihhlo do kumpuan hnuaia CADS thawhrimna chu chhuanawm a tih thu sawiin, thalaite tichhetu, ruihhlo lakah indo puan a nih thu leh thil tha lo laka mahni inven reng a tul thu a sawi a. Ruihhlo tam tak man a ni tawh chu thalaite chhanchhuahna a nih avangin Pathian hruainaah lawmthu sawiin, taima tak leh rim taka an do zel chuan Pathianin hlawhtlinna a la pe zel dawn tih a sawi bawk a ni.

Ruihhlo tihral takte hi heroin (No.4) hawng 317 & Tic Tac 1185, ganja 49.230 grams, codein 1215 bottles, AP, Pregabalin, Nap 10, etc. 8401 tablets leh zu (local) 31 bottles te an ni.