ZALEN September 26, 2026: Mizoram Home Minister K. Sapdanga chuan vawiin khan New Builum tlawhin, tualthihna avanga boral ta, Zakaria Lalhriattluanga (L), 9 Assam Rifles (AR), New Builum chhungte ralna hun a hmang. He hunah hian Lt. Col. Clement Lalhmingthanga, MLA (24 – Champhai South ST AC), TBC Lalvenchhunga, Advisor to Chief Minister, Home Minister nupui Darkhumi leh official dangten an tawiawm a ni.

Home Minister K. Sapdanga chuan he thil thleng hi mitinin pawi an tih thu leh sawrkar pawhin pawi a tih takzet thu a sawi a. Hetiang tualthihna rapthlak hi thil thleng khat tak a nih thu sawiin, sawrkar chuan hrehawm a tiin Zakaria nu leh pa leh a chhungte zawng zawng chu a lainat takzet a ni, a ti.

Minister chuan, "State sawrkar aiawha ral tura rawn kal kan ni lo va, Mizo kan nihna anga kan lainatna rawn lantir turin hotute nen inrawnkhawmin kan rawn kal a ni," a ti. Vanduaina a thlen atanga darkar 3 chhung leka misual man theih a ni chu Police-te chungah lawmthu a sawi a. Dan pangngaia charge sheet thehluh nan ni 90 phut ni thin mah se, an inpeih fel thawkhat tawh a ni tiin, misualte hian an thiltih sual mil ngei hremna hmuh an phu a ni, a ti.

All Mizo Ex-Service League President ni bawk, Lt. Col. Clement Lalhmingthanga, MLA pawhin thu sawiin, Zakaria chu ram leh hnam tana inpe, active service lai (9 AR) a nih thu leh, India ram tana mi tangkai leh uiawm tak a nih thu a sawi a. Ram leh hnam tana a inpek ang chiahin, a thianpa nun chhan nan thian chhan thih ngamin a nun a hlan chu chawimawi tlak a nih thu a sawi. Hetiang taka rangin Home Department-in case an chhuichhuak chu lawmawm a tih thu leh, sawrkarin a ngai pawimawh hle chu lawmawm a tih thu a sawi bawk. Zoram pumin an sun mek tih sawiin, he hunah hian Ex-Servicemen te an rawn tel ve chu lawmawm a tih thu a sawi.

Zakaria pa pawhin Home Minister leh a tawiawmtute an rawn kal chu lawmthu sawiin, a fapa bungrua leh thawmhnaw rawn thleng tur chu a huphurh hle tih a sawi a. A fapa chu chhungkaw innghahna ber a nih thu leh, an in sak lai pawh la zo lova a kalsan thu sawiin, a nau chu inhlawhfain ei a zawng mek tih a sawi bawk. Ni 6 chhunga case chhuichhuah a ni chu lawmawm a tih thu sawiin, a fapa thihnaah hian rorelna dik tak an phut thu a sawi bawk a ni.

He hunah hian Home Minister leh MLA pahnihte chuan sawrkar atang ni lovin, anmahni mimal tuak khawmin ralna sum an hlan a. Home Minister, a nupui leh TBC Lalvenchhunga te hian sunna puan an hlan bawk a ni.

Zakaria Lalhriatluanga hetianga mi kut tuara a boral hi Mizoram Sawrkar chuan pawi a ti in a ngai thutak hle a. Mizoram Police te chuan he thil thleng chungchangah hian rang taka hma la zui nghalin a thattu nia puh mi 8 te chu 20.09.2026 khan man nghal an ni a. Kawnpui Police Station ah tualthah thubuai ziah luh nghal a ni.

Zakaria Lalhriattluanga thattu nia puh mi 8 zinga puitling 6 te chu dt.21.09.2026 khan Kolasib Disrict Prison & Correctional Home ah dah luh nghal an ni a, kum tling lo mi 2 te pawh Observation Home, Thingdawl-ah dah luh nghal an ni bawk. Heng mite bakah hian thilsual titu a puh midang pakhat chu 23.09.2026 khan man belh leh in hemi ni vek hian Prison & Correctional Home, Kolasib ah dah luh leh nghal a ni bawk.