ZALEN July 09, 2026 : Aizawl Municipal Corporation (AMC) chuan AMC area-a Hotel leh Home Stay neitute pualin niminah khan bawlhhlawh sawngbawlna dan thar Solid Waste Management Rules, 2026 hmelhriattirna, zirtirna leh waste generator te mawhphurhna hrilhfiahna hun AMC Auditorium-ah an buatsaih a. He hunah hian AMC area-a Hotel leh Home Stay neitu mi 152 an kal a ni. 

Programme hi Joseph H. Lalramsanga, Municipal Commissioner, AMC in a kaihruai a, Khuallian H. Lalremtluanga, Aizawl Mayor chuan thu sawiin, Solid Waste Management Rules, 2026 hi Ministry of Environment, Forest & Climate Change in Environment (Protection) Act, 1986 behchhana a duan, India ram pumah April 1, 2026 atanga hman tan a ni a, mipuite thawhhona zarah hlawhtling taka kalpui a nih leh ngei a beisei thu sawiin, thawhho puiah AMC area-a Hotel leh Home Stay neitute a sawm nghal bawk a ni.

K. Lalrodinga, Executive Corporator (i/c Solid Waste Management) pawhin thu sawiin, an hun hlu tak senga AMC in programme a buatsaih chhimtu Hotel leh Home Stay neitute hnenah lawmthu a sawi a. Hotel leh Home Stay siamtute avangin mi tam takin eizawnna an nei thei chu lawmawm a tih thu a sawi bawk a ni.

C. Lalmuanawma, Town Planner, AMC leh Veronica Vanlalhriatpuii Colney, Assistant Architect, AMC leh Kennedy Vanlalnunmawia, Assistant Engineer, Aizawl Smart City Ltd. te hnen atangin SWM Rules, 2026 in bawlhhlawh thliar hran dan tur te, sawngbawl dan tur leh waste generator mawhphurhna hrang hrang a sawite ngaihthlak a ni a. Bawlhhlawh ngah zual te chungchang te, chi 4 a bawlhhlawh thliar hran tur thu te, a khawn khawm dan tur leh pawimawh dangte ngaihthlak a ni. 

Bulk Waste Generator te hian dan tharin a phut angin an bawlhhlawh te an sawngbawl a tul tawh dawn tih an sawi a. Hemi hnuah hian Hotel leh Home Stay neitute nen sawi hona hun hman a ni. He dan thar ang hian bawlhhlawh thliar hrang tha lo te, a hmun loa bawlhhlawh paih te chungah na zawkin hremna pek theih a ni dawn a, zawm tha lo leh thu awih lo te chu man theih an ni tawh dawn bawk a ni.