ZALEN September 7, 2026: Mizo film-a sulhnu ngah tak C Hmingthangvunga chuan a film thar 'Hringnun Hling' chu Zirtawpni zan khan Rajya Sabha MP K. Laltluangkima'n Chanmary YMA Hall-ah a tlangzarh a. Tlangzarh hnuah Lersia Play leh Runmawi App-ah a duh tan a en theih nghal a ni.

Hringnun Hling - film hi Mizo film industry sulsutu zinga chhiar hmaih theih loh tur, C Hmingthangvunga direct a nih piah lamah, a produce nghal bawk a. Ani hian Fadyo Pictures Production banner hnuai atanga a buaipui leh a tihchhuah niin, he production banner hnuai atanga Mizo feature film 14 a tihchhuahna chiah niin, kum 1998-a - Eng Dang Vang A Ni Lo - film kha a tihchhuah hmasak ber a ni.

Hringnun kawng chhuk chho leh harsatna hrang hrang tar lanna film - Hlingnun Hling - film thawnthu hi H Vanlalveni ziah a ni a. Mary Vanlalruati, Vanlalhruaizela, Florence Vanlalhriatzuali, Larry Lalhmangaihkima, Em Es Hauzel, Dr Thartea, Laldinmawii, Lalruatzela leh Lalrinzuali te chu a changtu hming langsar ber ber an ni.

Hringnun Hling chu

Zoram Muanpuii hi Kolasib-a post police SI, patil lek lek a ni a, a thawhpui Baby-i, ASI nen an inngaizawng a. A nau Puitei pasal neihna atan chawlh lain inah a haw a, mahse a pasal tur Sangpuia nu, Hruaii chuan a monu tur atan hausak pui Siamtei a duh zawk a. Remruatna verther tak hmangin inneih tur chu chawpchilh takin a thulhtir ta a ni. 

Naupan lai atanga a pa'n mipa anga a lo hrual chhoh Muanpuii chuan he buaina hi a tuar ta a; chutih laiin Sangpuia u, police officer Rinawma chuan Muanpuii chu hmangaihna leh khawngaihna mitin a lo thlir reng thung.

Sangpuia leh Siamtei te inneih hnuah buaina a chhuak a. Sangpuia nen insualin Sangpuia'n pistol-a a kah hliam hnuah Muanpuii chuan dawhkana fork hmangin Sangpuia a vih hlum tak avangin Central Jail-ah kum hnih leh a chanve a tang ta a. Jail-a a tan chhung hian lem ziak a zirin, MKi nen inthian tha tak an lo ni chho bawk.

Muanpuii jail atanga a chhuah theih nan Rinawma chuan ukil a lo rawihsak a, Muanpuii nu damlo inenkawlna senso pawh a lo tumsak vek a ni. 

Muanpuii chuan tan in a chhuah hnuah 'Zorinpuii' tiin a hming a thlak a, lem ziak hmangin eizawngin a nau thihna leh an chhungkaw chhiatna thleng chunga phuba lak a tum chho ta a. Mahse, Rinawma'n a rukin a lo tanpui reng a ni tih a hriat chhuah a, Rinawma puihna leh hmangaihna avangin an inngaizawng ta a, Muanpuii chu a rai ta a ni. Mahse, tluang takin awm zui mai lovin Muanpuii chuan Lunglei-ah Rinawma tlansanin kum nga zet a fanu nen an khawsa ta hrih a.

Hemi hnu hian a thiannu MKi chu a naupai chhan leh a hmangaih Jerry-a (pawmlai nei) chuan rekhlumin a thi tih a hria a. Muanpuii chu Aizawl-ah let lehin, Jerry-a chu a sawp ta vak mai a. Tlan bo a tum a, Rinawma chuan hmuin a kap a; mahse a mi kah chu Muanpuii a ni tih a hriat chuan pawi a ti takzet a ni.

Muanpuii chau tawh tak chuan an fanu chungchang Rinawma a hrilh a, chu mi hmunah chuan Pastor pakhat inkhawm bang chuan Rinawma leh Muanpuii te chu inneihtir nghal chuk chuk ta a ni. 

 A tukah chuan damdawi inah Muanpuii a lo harh a, a fanu leh a hmangaih em em Rinawma-te inpawm hmel a hmuh chuan lawm avangin a mittui a luang a.