ZALEN February 1, 2026: Zoram People Movement (ZPM) party chuan Indian Air Force (IAF)-in Lengpui leh Sihphir ram a lak chungchang chu CBI chhuitir ngei an duh tih an puang.

ZPM media cell chairman, revenue minister ni bawk, B Lalchhanzova chuan nimin khan Aizawl Press Club-ah thuthar thehdarhtute kawmin he thu hi a sawi a. IAF-in Lengpui leh Sihphir ram a lak chungchangah umzui tur tam tak a awm ang tih sawiin mipuite pawhin thu dik hriat hi an chanvo a nih avangin ZPM party chuan CBI chhuitir ngei an duh tih a sawi.

B. Lalchhanzova chuan, “Revenue minister kal chhuak ta, Pu Lalruatkima, treasurer, MNF Gen. hqrs. leh Pu Lalnunmawia Chuaungo, MPCC senior vice president te hi CBI-in an chhui theih tura FIR thehlut ngei turin kan phut a, kan lo ngaichang dawn a ni,” ti bawkin, an thehlut ngam lo a nih chuan eng emaw hlauh an nei nia an ngaih tur thu te, an thehluh ngam ngei pawh an rin thu te a sawi a, IAF ram kaihhnawihah mipuiten thil awm dan dik tak an hriat fiah phah thei dawn niin a sawi bawk.

Uluk taka document-te chhui leh an indawr tawn dan en letin MNF sawrkar lai khan lo tifel hman ta se IAF hnenah chatuan atan Mizoram leilung hi an lo hralh fel hmak dawn tihna a nih thu sawi bawkin, mipuite pawn an hre lo rei viau mai thei niin a sawi.

He thil kaihhnawih hre tura ngaih politician-te tar langin B Lalchhanzova chuan, Lalruatkima, ex-revenue minister; H Rammawi, ex-planning board vice chairman-in rang zawka hmala turin DC Aizawl a nawr thu an hmu niin a sawi.

Congress party senior vice president ni mek, Lalnunmawia Chuaungo pawh MNF hun laia IAF hnena ram hralh tuma hmalak hun lai, February 12, 2019 atanga October 29, 2021 chhung Mizoram chief secretary a nih thu te, kha tih hunlaia DC enkawltu GAD changtu chu Zoramthanga, Ex-CM a nih thu te a sawi a, “Anni hian thu dik sawi duh se sawi tur an nei hlawm ngei ang a, an ngawi ral dawn nge thu dik inthup an puang dawn tih chu kan nghak ta thup mai a ni,” a ti bawk.