ZALEN, June 01, 2025: LPS Youth Icon 2024 boruak a dai deuh tawh emaw tih laiin a lo la zo tak tak thei lo, nau piang thar pawh Icon ngaihsan avanga a hming ang phuah hial pawh an awm thar e!

Youth Icon Lalsangliana (Taitea) chuan Pathianni zan khan a Instagram account-a a story-ah amah ngaisangtute nena an inbiakna tar langin naute thar hmingah a hming ang an phuah thu an hrilh a. Taite hian ‘A ropui ka ti êm a ni’ tih dah telin a pho chhuak a ni.

Taitea’n Saitual district-a Phullen Rural Development Block chhunga khaw pakhata mi nen WhatsApp-a an inbiaknaa a tar lan dan chuan a betu hian, ‘May 20 khan naute mipa kan nei a, kan ngaisangin kan chhuang em che a, i hming ang chiah, Lalsangliana (Taitea) tiin kan phuah ve e’ tiin a thawn a ni.

“Kan ngaihsanzia che lantir nan, i hming kan chawi ve tih kan rawn hrilh che aw...,” tiin an ziak bawk.

Youth Icon thlan hnuhnung ber khan boruak a nei lian hle a, Top 10-a lang chinte chuan thil pek liantham leh danglam angreng tak tak pawh an lo tawng nual tawh a, tun tuma mi erawh thil ropui bik tak niin Icon atana thlan chhuah, Bawktlang tlangval, Taitea pawhin ropui a tihzia a tar lang a ni.