ZALEN, June 10, 2025: LPS Vision Production leh Youth Icon 2024 Top 10 tangkawpin khuarel chhiatna tuarte tanpuina tura Inrinni zana charity concert an buatsaihah Rs. nuai 6 an hmu chhuak.

Concert hi LPS Studio-ah neih a ni a, Icon Top 10 zinga atangin mi pahnih, Samson Lalhunruata leh Laldinhlua tih loh an inlan thei vek a; J.Lalrosanga pawh a zinna, USA atangin YouTube kaltlanga inlanin ama hla phuah chu tingtang intumin a sa a ni.

TV leh Youtube-ah concert hi live-a pek chhuah a ni a, Icon star-te an zai chhungin vehbur khawn a ni a, chuta sum tlingkhawmte chu tihfel niin mipuiin khuarel chhiatna tawkte tana an thawh khawm hian Rs. nuai 6 a tling a ni.

LPS atanga thudawn danin charity concert neih chhung hian khuarel chhiatna tuarte tana sum thawh duh hi an thahnem hle a, sum pek khawmna tura bank account an dahte chu hman theih loh (jam)-in a awm hial a, sum thawh duh pe thei ta lo an awm phah nual a ni.

LPS Vision Production leh Youth Icon 2024 Top 10 chuan tanpuina tur sum leh pai thawtute zawng zawng chuan lawmthu an sawi a. An khawn chhuahte hi hun remchang hmasa berah Icon Top 10-ten an sem chhuak ang.