Aizawl: Aizawl Municpal Corporation (AMC) chuan Zirtawpni khan Tuirial bawlhhlawh paihna (Dumping Ground)-a bawlhhlawh chhara eizawng mi eng emaw zat hnenah Identification (ID) Card leh Safety Gear an sem. Aizawl Municipal Corporation (AMC) chuan bawlhhlawh hai thin (Rag Picker) hi Tuirial Airfield leh a chhehvelah mi 100 chuang an awm niin an hria a, heng mite hi mumal zawka enkawl dan kawng zawngin a bul tan nan Safety Gear (kut kawr & hmai tuamna) an pek bakah ID Card a siamsak vek bawk a ni. Safety Gear leh ID Card hlanna inkhawma khuallian AMC Deputy Mayor Lalringliana chuan Tuirial Dumping Ground chu tun aia changkang leh awmze nei zawka bawlhhlawh sawngbawl thuai a nih tur thu sawiin tun dinhmunah chuan bawlhhlawh chhar hi thil tha ber a ni lo chungin ti lo thei lo an awm tlat si avangin mumal zawka enkawla, an hriselna atan heng safety gears te hi ruahman a nih thu a sawi a. Deputy Mayor chuan AMC hriatpuina thlap lo chuan bawlhhlawh chhar khawm hi khap a nih tawh thu leh bawlhhlawh paih thin motor enkawltute pawh kawng dungah an bawlhhlawh hai tawh lo turin an tih thu a sawi bawk. Tuirial Dumping Ground-ah hian ni tin Aizawl khawpui bawlh-hlawh hi motor 100 vel paih thin a ni.