ZALEN, August 11, 2025: India aiawha Yonex-Sunrise BWF World Junior Badminton Championship 2025 khel turin Mizoram player pahnih, C. Lalramsanga leh H. Lalthazuala te an invaw tling.

Inrinni atanga National Centre of Excellence, Guwahati, Assam-a a khel thei tur zawnna, selection trial neih mekah Mizo player pathum inlan zinga atangin Sanga leh Thazuala hi an tling a ni a, India team-a mi 28 awmnaah an tel dawn a ni.

Mission Veng Badminton Club (MBC)-a khel mek, Sanga hi mixed doubles leh boy’s doubles trial tura koh niin mixed-ah hian Taarini Suri nen tangdunin vawi li khelhah vawi thum chakin khawvel huap inelna hmachhawn turin an tling a ni.

Boy’s doubles-ah Bjorn Jaison nen tangdunin trial hi an la hmachhawn mek zel a, hetah pawh invaw tling thei dinhmunah a la ding.

Chanmari Shuttlers Club (CSC)-a khel, Thazuala hi boy’s singles-ah inlanin India No. 1 Ansh Negi pawh straight set-in a hneh thei a, vawi li khelhah vawi khat tlawm mah se India aiawh turin a invaw tling.

Selection trial-ah hian Badminton Asia Junior Championship, Solo, Indonesia a neih zawh taka India aiawhtute bakah Badminton World Federation (BWF) ranking-a Top 20 leh Badminton Association of India (BAI)-a Top 8 chin koh an ni.

Yonex-Sunrise BWF World Junior Badminton Championship 2025 hi October 13-19, 2025 chhungin Guwahati-ah khelh a ni ang.

India aiawh tur zawnnaah hian tun hnaia Mizo hmeichhe champion, Lalrempuii pawh girl’s doubles-ah Zenith Abbigail nen an tangdunin an tling zo ta lo thung.

Mizoram Badminton Association (MBA) chuan an player-te a lawmpui thu leh Mizoram leh India ram tihmingthaa hlawhtlinna sang zawk chang zel turin duhsakna an hlan.