ZALEN, June 11, 2025: Indonesia-a Badminton Asia Junior Championships 2025-a India aiawh turin H. Lalthazuala, Chanmari West leh C. Lalramsanga, Durtlang te chu an invaw tling.

Inelna hi July 23-27, 2025 chhung hian Solo, Surakarta-ah neih a ni dawn a. Mizo rawlthar pahnihte hian Badminton Association of India (BAI)-in final selection trial paltlangin India aiawh hian an inlan thei dawn a. Lalrempuii, Serchhip erawhin trial a paltlang zo lo thung.

Thazuala hi Boy’s Singles-ah a inlan ang a, Ramsanga hi Taarini Suri nen Mixed Doubles-ah an inlan thung ang.

June 8-11, 2025 chhunga New Delhi-a India aiawha inlan tur zawnna hnuhnungah hian Boy’s Singles-ah India-a player tha rual 11 zingah a Thazuala hi a chungnung ber a. Stage 1-naah Group A leh B-ah inthenin Thazuala hi Group A-ah player dang panga a awmpuite nen an inkhel kual.

India No. 2 Gnana Dattu TT, No. 5 Suryaksh Rawat, No. 7 Sarvesh Mahesh Yadav bakah Badminton World Federation (BWF) No. 10 Sai Prasad Teegala leh No. 13 Abishek Kanapala te a hneh vek a, Stage 2-ah a lut.

Stage 2-ah hian Group A leh B-a a sang pahnihte an inkhel kual ve thung a. Thazuala hian India No. 4 leh Men’s Singles-a India No. 6 ni mek, Rounak Chouhan chu straight set-a a hneh hnuah No. 3 Pranauv Ram N chu deciding game-ah a hneh leh a, group stage-a a lo hneh tawh, Rawat chu straight set-a hneh nawn lehin a tumpuite hneh vekin India aiawh turin a invaw tling.

Mixed Doubles-ah trial hmachhawn turin India junior player tha leh ranking nei sang pair ruk koh an ni a. Ramsanga hi Suri nen an inkawp a, Rempuii leh Showrya Kiran J te an inkawp bawk.

Durtlang rawlthar, Ramsanga te hian top seed Vansh Dev leh Shravani Walekar te an hneh nghal a, Mithilesh PK leh Reshika U te leh Bjorn Jaison leh Vishakha Toppo te inkawp an hneh leh hnuah Serchhil tleirawl, Rempuii te thiandun an hneh leh bawk a, chak loh nei lovin trial an paltlang a, India ai an awh dawn.

Rempuii hi Girl’s Doubles-ah pawh inlan thei dinhmunah a ding a, a kawppui thin kianin a inlan ta lo va. Mixed Doubles-ah Ramsanga te thian dun an ngam loh bawk avangin India ai a awh thei ta lo a ni.

Mizoram Badminton Association (MBA) chuan an player-te hi a chhuang tak zet tih a sawi a, India ram tihmingthatu ni zel turin duhsakna a hlan.