ZALEN, May 27, 2026: Tun hnaia Aizawl khawpui lailia rawlthar intihbuaina thlengah a inhnamhnawihte chu an inngaidam nia hriat a ni a, police erawh chuan hetiang thil a thlen zui tawh lohna turin thubuai an ziak lut tho.

Social media-a video darhah Nilaini zing khaw var hma khan Chanmari huam chhung, Grand Hotel bula mi sawisak rawntu pangate hi hemi zan hian police-in an man nghal a. An zinga pathum chu Central Jail-ah dah luh niin mi dang pahnih erawh kum an la tlin loh avangin Remand Home-ah dah an ni.

ZALEN-in Aizawl SP atanga thu a dawn dan chuan buaina chhuaka inhnamhnawihte inbe remin an inngaidam tawn a; mahse, police hian tun hnua hetiang a thlen tawh lohna turin suo motto thubuai an ziak lut ta tho a ni.

Social media-a video darha a lan dan chuan buaina chhuakah hian Ramhlun North rawlthar pangain Chanmari rawlthar, Vanlalbeiseia an khawih rawn niin a lang a. A thianpa, Falkland-a mi nen lengin a hmain Bazar Bungkawnah an intibuai tawh nia sawi a ni a, an haw tur lo changin an khawih rawn ta a ni.

Police-te hian kut thlak rawntua puh, kum 18 mi vek, Lalrambeiseia Hrahsel, Samuel Lalhruaitluannga leh Zodintluanga te hi Ningani khan court-a an hruai hnuah jail-ah an dah lut a ni.

SP chuan Aizawla police station palite chuan zan tin an patrol thin thu leh buaina thleng, in kang leh lei min a awmin emergency call 112-ah hriattir vat thin turin mipui a ngen tih a sawi.