ZALEN September 21, 2026 : Vawiin khan MNF chuan 'Martar Day' Vawi 46-na chu Mizoram hmun hrang hrangah urhsun takin a hmang. Martar Day hi nimin kha a ni a, Pathianni anih avangin vawiin hian hman a ni. A hmanna pui ber Mizo Hnam Run, Aizawl-a thusawitu MNF President Zoramthanga chuan Inremma chu Inremnaa tel ve lo, a engamah hre tak taklote lo sawinep tum ve ngawt chi pawh a ni hek lo, a ti

MNF President Zoramthanga chuan Hnam Martarte hlutna leh ropuizia sawiin, "Ṭhangthar lokal zelte pawhin ram tana zalenna sualtu Mizo Hnam Sipaite leh Hnam Martar-te ngaihsan nachang leh hlut nachang an hre zui zel leh an ngaihven thar nasa hi ropui ka tiin lawmawm ka ti tak zet a ni," a ti a. "Hnam Sipaite leh he Hnam tana Martar-te inpekna leh hnathawh te, engkim huama an inhlan ralna kha a ropuiin a zahawm a. Vawiina la damte leh ṭhangthar lokal zel turte pawhin zah tak chunga kan hriat reng leh thudik hre tura kan zirchian a pawimawh hle a ni," a ti.

"Zalenna sualtu Mizo Hnam Sipaite leh Mizo Hnam Martarte thisen zara kan ramin thil tam tak a lo hlawhchhuah tawhte hi a hlu em em a. Inremna (Peace Accord) a awm theihna tura Kohhran, Political Party, NGO te, ram mipui leh kan Hnam Sipaite'n kan mipuite ngenna avanga inremna lo awm ta leh an lo hlawhchhuah kha a hlu em em a. Heng zawng zawng hi kan thinlungin engtikahmah a theihnghilh ngai lo va, kan ram tana nunna hlantu Hnam Martar-te thisen hi Mizoram tan a luang thlawn ngai dawn lo. Chuvangin vawiinah hian MNF leh he ram leh hnam hian zahna chibai i buk nawn leh ang u." a ti.

"Sawrkar lai mek Chief Minister te, kan Political Opponent ṭhenkhatin MNF movement leh Mizoram Peace Accord (Memorandum of Settlement) sawinep leh sawihnawm tum ṭhin mah sela,; Mizo Hnam Sipaiten kan ram leh hnam tan nunna thapa zalenna an lo sualna te, Mizo Hnam Martarte thisen man hlutziate hi a dal phah ngai dawn lo va, sawinep theih ngawt a ni lo a. Inremnaa tel ve lo, a engamah hre tak taklote lo sawinep tum ve ngawt chi pawh a ni hek lo," Zoramthanga chuan a ti.

MNF President chuan, "Harsatna tam tak paltlanga Mizoram Peace Accord-in a hlawhchhuah Article 371(G) te, kan ILP insawhnghehna tiderthawng thei zawnga ZPM sawrkar chet duh dan hi a demawm hle a. Kan thuneihna hmanga kan ram kan humhimna tur FCAA an lo dahkhamna zawng zawngte hi Pathian leh mipui zarah MNF a sawrkar leh hunah kan lalet ang a, kan ram leh hnam, kan mipuite tan kan sawhnghet leh ngei theih nan kum 2028-ah MNF hian Mizoram enkawl tura sawrkarna an chan leh ngei a ṭul a ni," a ti bawk.

Serchhip-a hmanpuitu Working President Tawnluia chuan Mizo Hnam Martar thlanmual, Luangmual-ah khuan MNF hnam sipai, zalenna suala Martarte chauh dah an ni lova. MNF pian hmaa British dotu Mizo Hnam pasalthate hming pawh dah vek a ni. Chuvangin Hnam Martar thlanmual dik tak a ni a ti.

Dy. CM hlui Tawnluia hian Lalduhoma thusawi chhangletin, "Kan CM-in Law zirlaite hmaah MNF leh Home ministry inremna chauh a ni. MNF te hi Mizoram aiawh a ni lo, a ropui chiam lo ve a ti duh a. Inremna pawh teitet a tum lui ngar ngar a ni. ILP pawh sawrkar laipuiin an duh hun hunah an hlip thei a ti duh a. Hetiang zawnga sawi duhtu kan CM ni mek, Serchhip bialtu MLA hian 'dawih aw, tlanchhe aw' a chhuah a ni, a ti a. '"Tunhnaia MNF OB ruat tharte hian tumahin candidate nih kan tum lo.Ṭhalaite khawvel a ni tawh a, chuvangin MNF hian ram kaihruai a, hmasawnna kawng zawhpui turin mizo nationalism a chiang ṭhalai a tam thei ang ber kan candidate dawn a ni," a ti bawk.

MNF hruaitute hian a hnuaia mi ang hian hmun hrang hrangah Martarte Ni hi an hmanpui a ni:

Lunglei-ah Senior Vice President Dr.R.Lalthangliana MLA; 

Saitual-ah Vanlalzawma, Vice President, Ex-MP ;

Khawzawl-ah Lalruatkima Treasurer ; 

Mamit-ah Vice President Lalchamliana; 

Kolasib-ah D.Thangliana Vice President; 

Hortoki-ah Adviser MNF GHQ K.Laldawngliana, MLA ; 

Hnahthial-ah Adviser TC.Pachhunga Ex-MLA; 

Khawbel-ah General Secretary GHQ Er.Lalrinawma, Ex-Minister ; Kawlkulh-ah General Secretary Dr. L.Thangmawia Ex-MLA .