ZALEN August 12, 2026: Food Civil Supplies & Consumer Affairs Minister B.Lalchhanzova’n leng tura a sawm angin vawiin khan India Hmarchhaka Indian Oil hotupa ber Nitin Bhatnagar, Executive Director IO-AOD hi a leng a, Minister hian Mizoram-in Oil Depot nei tura an hmalakna te a lo hrilh.

Minister chuan Mizorama Oil Depot bun a nih theih nana hmalakna kal mek chungchangah hmasawnna awm tawh te, hmalak zelna tur kawng te a lo sawipui a. Khuarel chhiatna thleng thei te, thenawm state-a buaina thleng palh emaw, chhiatna thleng thulhah, tuialhthei lakluh a harsat ṭhin avangin Mizoramin a dahkhawlna liantham Oil Depot an mamawh tak zet a ni, a ti.

Minister chuan State sawrkarin Oil Depot siamna tur hmun engemawzat a enfiah tawh thu leh heng hmunte hi IOCL lam pawhin an rawn endik tawh thu a sawi a. A theih dan awm thei apiang umzuiin Mizoramin Oil Depot a neih ngei theih nan theihtawp a chhuah zel dawn a, Oil Depot siam nan ram pawh a thlawna company hnena pek tur a awm tur thu Executive Director IO-AOD hi a hrilh a. Prime Minister-in Mizoram a rawn tlawh hunah pawh lo thualnawn leh ngei a tum thu a Supply Minister B Lalchhanzova chuan a sawi bawk.

IOCL chuan Mizoramah Oil Depot din ngei an duh thu leh Mizoram Sawrkara FCS&CA department te nen an indawrna pawhin hma a sawn zel tih Nitin Bhatnagar chuan a sawi a. Chief Minister leh Supply Minister ten hemi kawnga thahnem an ngaihna chuan rah tha a chhuah ngei a beisei thu leh, Company lam leh Ministry of Petroleum and Natural Gas hnenah pawh an theih anga hma an lak ve mek thu Minister hi a hrilh a ni.