ZALEN May 5, 2026 : Central Seat Alloction Board (CSAB) 2026 bultumin vawiin khan IIEST, Shibpur te chuan JEE Exam-a tling lo, 65% mark hmu pha lo Engineer zir duh te tana zir theih dan chanchinthar thehdartute an hrilh a, North East state leh Union Territory mi te tan Class XII Science-a 40% hmu chin tan pawh zir theih a nih thu an sawi.

Aizawl Press Club-a chanchinthar thehdarhtute an kawmnnaah hian CSAB 2026 hotute chuan JEE leh JEE advance pass te tan IIT leh NIT-ah te seat hmuh a awlsam a, chutihrualin he exam-a tling lo tan pawh Central Seat Alloction Board (CSAB) leh Joint Seat Allocation Authority (JOSAA) counselling kaltlanga seat hmuh dan a awm a, hetah hian JEE-a tling lo tan CSAB-ah a hranpa-in form fill-up leh erawh a ngaih thu an sawi.

CSAB hotute chuan JEE leh JEE Advance a tling te hian India rama Engineering Collge-a seat awm hi an luah khat zo lo an ti a, heng seat ruak tam tak la awm hi CSAB kaltlang hian NIT, IIEST Shibpur, IIIT leh GFTI engawmzatah admission tih sak an nih thin tih an sawi.

North East state leh Union Territory te tan CSAB (NEUT) a la awm tih an sawi bawk a, hemi kaltlang phei hi chuan Engineer zir duh te tana bituk Class XII Science-a 65% mark hmuh kher pawh a ngai lo an ti a, 40% hmu tling chin tan pawh dil theih a nih thu an sawi. 

National Institute of Technology Mizoram Dean (Academics) Sukanta Roy chuan, NIT Mizoram-ah seat 190 an neih thu a sawi a, heng zinga 95 te chu Mizoram zirlai te tan reserved a ni a, stream hrang hrang an neih-ah 50% seat chu Mizoram atanga Class XII Science pass chin tana reserved zel a ni, a ti.