ZALEN June 21, 2026: Sawkar laipuiin ni 100 inhlawhna thin thlakna atana a duan, Viksit Bharat – Guarantee for Rozgar & Aajeevika Mission (Gramin) chu July 1, 2026 atang hian hman tan a ni dawn a. Hemi atan hian kum khata Mizoram sum mamawh tur chu Rs. vaibelchhe 1189 vel ni tura chhut a ni.

ZALEN-in Rural Development & Administration thawktute hnen atanga thu a dawn danin VB – G RAM G Act, 2025 hi thingtlang mite hmasawnna leh inhlawhna tur siamna dan a ni a, a tum ber chu thingtlang hmasawnna leh kum 2047-a Viksit Bharat - India ramin intodelh, ram changkang nih a tumna nen thlun zawma kum khatah ni 125 inhlawhna thingtlanga chengte tan siam leh hmasawnna ruhrel tha leh tlo siam/ din a ni. 

VB G RAM G Act hi July 1, 2026 atangin India state hrang hrangah kalpui tawh tur a ni a, he dan hian sawrkar kum khat (financial year) chhungin thingtlanga he danin a sawi anga thawk thei/tling chhungkuaa mi, kum 18 tling chin leh thiam thil ngai lo (unskilled work) thawk hreh lo te tan ni 125 inhlawhna siam a tiam a ni. 

Mahatma Gandhi NREGA hnuaia hnathawh mekte chu VB G-RAM G thawh tan hunah pawh ngaih pawimawh chhunzawm zel tur a ni a, vantlang hmasawnna ruhrel thawh mekte thawh zawh loha dah loh tur a ni. 

VB – G RAM G hnuaia a thar pek an nih hma loh chuan MGNREGA Job Card neitute, e-KYC tifel tawhte chu he dan thar hnuaiah hian an inhlawh chhunzawm zel thei dawn a ni.

Zawhna chhangin RD&A thawktute chuan thingtlanga cheng chhungkua, MGNREGA job card nei lote chuan an hming, kum zat, address leh chhungkaw detail te chu VC hnenah thehlutin Gramin Rozgar Guarantee Card an dil thei dawn a ni.

RD&A thawktute chuan district level-ah deputy commissioner emaw a tlukpui officer, state sawrkarin a ruat chu District Programme Coordinator a ni dawn a. Programme Officer atan hian Block Development Officer rank aia hniam lo ruat tur a ni.

VB – G RAM G hi Centrally Sponsored Scheme ni tawhin, State sawrkar (NE States/UT) ten 90:10 in fund sharing pattern an nei dawn a ni. MGNREGA ah chuan mipui inhlawhna (wage component) kha 100% sawrkar laipui tum a ni a, VB – G RAM G ah chuan wage component, material component, audit cost te nen state sawrkarin central atangin 10% a tum ve tawh dawn a ni.

Zawhna chhangin RD&A thawktute chuan kum khat atan VB – G RAM G atan hian Mizoram chuan cheng vaibelchhe 1189 mamawh tura chhut a ni a, heng zinga vbc 1070 hi sawrkar laipui leh vbc 118 hi state sawrkar tum tur a ruahman a ni. MGNREGA-ah hian hnathawktu pakhatin ni khatah rs. 281 an hlawh a, VB – G RAM G ah hian hlawh zat tur hi la tihchian a la ni lo a, tlema tihsan a nih rin a ni. Job card pawh MGNREGA rin phawt tur a ni a, mahse design thar siam tum mek a ni.