ZALEN November 4, 2025: Dampa bial By Election Campaign kal mekah vawiin hian Bawngthah, Darlung, Sabual leh Bawlte, Kanghmun, Lungphum, Hreichuk leh Khawrihnim khua te MNF Sr. Vice President Dr. R. Lalthangliana chuan a tlawh a, "Mipui sawrkar tia inzuarte chuan mahni inhaivurna lam hlir an kalpui leh si tih hi a hrechiangtu chu mipui kan ni. Kan Ram hliam tuar mek chhanchhuak tur hian Dampa bial mipuite i tangho ang u," tiin Dampa bial mipuite a sawm a ni.

Thangtea chuan, "Ration buhfai man uchuak taka ti sangtu hi Dampa bial By Election ah hnawlin, 2028 ah hian Ram rorelna hi MNF kutah a awm ngei theihna turin Boruak tha tak mipuiah kan nei mek a ni," tiin, Loan rulh leh ngai hmanga bana inkaih leh CM Special packages, a tak ram thleng hlei theilo hmanga beih tum ai chuan, Rulh ngailo a hmala leh turin MNF chu a inbuatsaihna mek a ni, a ti bawk.

Dr. Thangtea hian Bawngthah khuaah ZPM Unit Secretary hovin member 4 leh BJP Vice President hovin member 9 te chu MNF ah a lawmlut a ni.

MNF Official Candidate hi Dr. ZR Thiamsanga, General Secretary, MNF Gen. Hqrs leh hruaitu dangten an tawiawm a, Dr. Thiamsanga chuan, "COVID-19 hripui hlauhawm lutuk leng karah Pathian venna hnuaia rim taka Zoram mipuite tana thawktu Pu Thangtea hi, a tak taka thawk a, Zoram tana theihtawp chhuahtu, ram hruaina kawnga mi rintlak berte zinga mi a ni. Pu Lalrintluanga Sailo (L) hriat rengna atan Pu Thangtea Vote theuh turin bial mipuite kan sawm tak meuh che u a ni," a ti.