ZALEN May 14, 2026: Manipur-a Kangpokpi district-a Kotzim leh Kotlen inkara May 13, 2026-a sakhaw hruaitute chuanna lirthei pahnih lambun (ambush) a ni chu Council of Churches in Mizoram (CCM) chuan pawi a tiin mi thi chhungte leh hliam tuar te an tawrhpui tih thuchhuah an siamah an tarlang. 

He chhiatna thlengah hian nunna chan mi pathum, Rev. Dr. Vumthang Sitlhou, President, Thadou Baptist Association (TBA) ; Pastor Kaigoulun Lhouvum, Secretary (Finance, Youth & Music), TBA leh Pastor Paogoulen Sitlhou, Superintendent Pastor, TBA bakah mi engemaw zatin hliam an tuar a, hei hian tualchhung hmun hrang hranga chengte zingah hlauhthawnna leh rilru natna nasa tak a thlen a, he lungngaihna hi North East-a Kristian zawng zawngte pawhin an tawrhpui a ni, an ti.

Council of Churches in Mizoram chuan he tharum thawhna hi nasa takin a dem a. Tharum thawhna hian inthliarna a tizual a, hrehawmna a pawtsei a, mipui inkara inlungrualna awm thin tichhetu a ni an ti. Manipur-a remna tluantling a lo awm leh theih nan Kristian zawng zawngte chu ṭawngṭai hram turin CCM chuan a sawm a. CCM hian nunna chantute chhungte, Kohhran, leh Manipur mipui zawng zawngte a tawrhpuina thu an tarlang bawk.