ZALEN Nov. 6, 2025 : Pukpui Khawtlang hruaitute chuan Kawmzawlah Leitlangpui Music Festival buatsaih rem an tih loh thu Lunglei Bawrhsap hnenah an thlen.

Pukpui Local Council leh All NGO vawiin (6.11.25) a thukhawm chuan an veng huamchhunga Event lian tham buatsaih turah khawtlang hruaitute biakrawn an ni lo chu lungawithlak loh an tih thu leh inpalzutnaah an ngaihthu Bawrhsap hnenah thlenin, Kawmzawlah Leitlangpui Music Festival buatsaih rem an tih loh thu an sawi.

Pukpui Khawtlang hruaitute chuan rem an ti lo chunga LMF kaltlangpui a nih chuan buaina leh harsatna awmthei thilah mawh an phurh loh tur thu an sawi bawk.

Leitlangpui Music Festival 2025 hi November ni 13-15, 2025 (Ningani-Inrinni) chhungin Pukpui Kawmzawlah buatsaih tura ruahman a ni a. Zai, lam, hnam thil leh kut them thiam thil pho chhuahna, thuam leh ei leh in chi hrang hrang zawrhna leh intihhlimna chi hrang hrangte buatsaih leh tura ruahman a ni.