ZALEN, October 19, 2025: KC TVS chuan hma an sawnna tinghet zel turin huang an zauh a, anmahni dawrtuten chet vel a awlsam zawk nan Aizawl chhim lamah service station an hawn belh.

October, 2022 atangin KC TVS hian an hmunpui, Bawngkawn, Aizawlah showroom hawngin service an kalpui tel nghal a. Lirthei hralhah hma an sawn zel a, kum thum an tlin rualin Model Vengah branch an hawng a, service kalpui nghalin showroom pawh neih zui thuai an inbeisei.

An service station pangngaiah chawhrualin ni tin lirthei 30-40 vel an khawih thin a, an hmunhma a zauh tawk loh avangin an duhkhawp lo deuh va, anmahni dawrtute tan nghah rei a ngai phah fo.

Model Vengah mechanic tha dahin chhiatna liantham leh khawih harsa bik ni lo, service pangngai leh a part thlak ngai an ti thei vek a, part hman lar leh tlanglawn a kawl kim thawkhat a. A bikin Aizawl chhim lama mipui tan pan awlsam zawk a nih an ring a, heta service an tih avang hian warranty an neih a thih phah dawn lo tih an sawi bawk.

Chief Executive Officer Kevin Vanlaltlana chuan, “Tihchangtlun zel kan tum a. Model Venga service station thar chhungah hian showroom hawngin lirthei hralh chhuanna tur kan buaipui tel nghal a, kan la zo lo deuh,” a ti.

TVS hi Indian company rin tlak a nih bakah a part a tlawm avangin a hre chiang chuan an duh phah niin a sawi a. Chubakah hmasawn thei turin lirthei chi hrang an ngah a, electric scooter duh tan iQube a awm a, sports leh street bike duh tan Apache RTR chi hrang hrang bakah cruiser lam ngainate tan Ronin an kawl tel bawk.

TVS Motor Company hi India-a two-wheeler hralh hnem pathumna a ni a, Jupiter 125 phei chu India rama scooter hralh hnem ber dawttu a ni a. Mizoramah pawh two-wheeler hralh tam pathumna ni mekin Ntorq a lar ve a, tun hnaiah Jupiter duhtu pungin taxi atan pawh an intihmuh chho tan niin an hria.

Kevin-a chuan, “Mizoramah chuan Ntorq hi kan hralh tam ber a la ni reng a; mahse, Jupiter nen kan hralh chhuah a inzat deuhthaw tawh a. India-ah Jupiter an duh hle a, Mizoramah pawh a thatna kan hre telh telh niin a hriat a, taxi atana rawn hauh lawk pawh an awm nual mai,” a ti.