ZALEN, June 29, 2025: Mizorama infiamna chi hniha hriat hlawh, Lalrina Renthlei chu Mizoram Super League (MSL) X-a a inkhelhnaa a ke na la dam lo nen thawk chhuak mah se Mizoram 10 Ball Pool Championship 2025-ah tumah tluktu a nei chuang lo va, Inrinni zan final-ah hnehna a chang.

Tuikhuahtlang, Aizawla cheng, Lalrina hian Mizorama basketball inelna sang hlawh ber, MSL X-ah khan Zarkawt BCA tana player pawimawh ni chungin April thla khan a champion-pui a, a ke a tina thung a, tun thlengin a la rap tha ngam lo.

Ball vawm sawh piah lama dawhkana ball hawlh lama Mizo player thleng thui ber hian Mizoram Snooker & Billiards Association (MSBA) buatsaih Mizoram 10 Ball Pool Championship 2025 chu ke bai chungin a hmachhawn a, Inrinni zana final-ah hian 8-4-in Lalchhandama hnehin nomawi a la.

MBSA Hall, Hawla Indoor Stadium, Republic Vengthlanga final khelhah hian Lalrina leh Dinthar Veng pa hi a tir lamah frame an inlak chhawk zak zak a. Dadama chet a phet zeuh chu a tumpui hian remchangah hmangin nomawi a lak theih phah.

10 Ball Pool Championship 2025-ah hian Mizoram hmun hrang hrang atangin infiammi 60 chuang an tel a, knockout-a khelh niin, first round leh top 32 chu race to 4 (frame li la hmasa sa chak)-a khelh a ni a. Top 16 atangin race to 5, quarter finals-ah race to 6, semi finals-ah race to 7 leh final-ah race to 8 a khelh a ni.

Inrinni tlaia final khelh hma hian championship-a tla hmasate tan chhun lamah one day tournament buatsaih niin race to 3-a khelh inelnaah hian David Lalnunhlima, Saron Veng chu pakhatna niin Henry L Hlawnmual chu pahnihna a ni.