ZALEN May 7, 2025 : Operation Sindoor kalpui a nih hnuah India chuan Pakistan hmun engemawzat a bei a, India Jet te pawh kahthlak niin an sawi a, khawvel ram dang te chuan ram pahnih te chu insum theihna lantir turin an ngen hlawm.

Pakistan leh Pakistan-in a awp chin Kashmir a beih te hi India chuan terrorist te inkulhna hmun leh training an neihna hmunah a chhal a ni.

Islamabad lam chuan India army te inkulhna an kah thu leh indo thlawhna pawh an kap thla a ti a, India in a beihna chu indonaah an chhal.

Nilaini zinga lama inbeihna avang khan mi 26 chu Pakistan chhungah thi an awm a, India awp chin Kahmir lamah mi 10 an thi niin official te chuan an puang.

Khawvela ram hruaitu te chuan nuclear nei ram pahnih inthenawmte buaina hi hetiang hian an sawi.

United States President Donald Trump chuan, "Thil zahthlak tak a ni. He thil hi ka lo hre ve a. mi te hian tunhnai thil thleng avang khan thil thleng tur hi rinlawk chu an nei ngei ang. Anni pahnih hi hun rei tak atanga inbei reng sa an ni. Chhuan engemaw chen an inbei tawh. A tawp vat erawh ka beisei," a ti.

South Asia-a sipai te chet dan thli thlai reng tu, US Secretary of State Marco Rubio chuan X-ah "India leh Pakistan dinhmun hi ka thlithlai reng a. POTUS comment pawh vawiin khan ka lo chhang tawh a, he thil thleng hi a tawp thuai ka beisei a, India leh Pakistan hruaitute hi remna leh muanna a awm theih nan hma ka la chhunzawm zel dawn a ni," a ti.

United Nations Secretary-General Antonio Guterres a thupuangtu chuan, "Secretary-General chu India sipai te Line of Control pela an chetna hi a ngai thutak hle a. Ram pahnih sipai te hi insum theihna sang tak nei turin a ngen a ni," tiin thuchhuah a siamah a tarlang a, "Sipai chakna hmanga India leh Pakistan inbeihna hi khawvel hian a tuar dawn a ni," a ti.

Israel'n ambassador to India, Reuven Azar chuan thuchhuah a neihah Israel chuan India hian amah inven nan dikna chanvo a nei a ti a, X-ah Asar chuan, "Israel chuan India-in a invenhimna atana a thil tih hi kan thlawp. Terrorist te hian mi pawisawi lo te lakah thil sual lian tak an tih avangin khawi hmunah mah bihrukna an hmu tur a ni lo. #OperationSindoor," tiin a post a ni.

Beijing chuan ram pahnih te chu insum turin a ngen a, China Foreign Ministry thupuangtu chuan, "China chuan tukina India sipaite chetna hi pawi a ti a, an hmalak zelna erawh a ngaihven reng a ni. China hian terrorism hrim hrim hi a do. India leh Pakistan te hi remna leh muanna dah hmasa turin kan ngen, fim leh dam taka awm a, hemi chen bak hi thleng lo turin kan ngen a ni," a ti.

French chuan nuclear nei ram pahnih India leh Pakistan te inkara tharum thawwhna chu chhe ber a thlen loh nan insum turin a ngen. French foreign minister Jean-Noel Barrot chuan, "India-in amah inhum him nana terrorist te beih a duhna hi kan hrethiam, mahse, India leh Pakistan te hi insum theihna nei a, thil chhe zawk a thlen loh kan duh a, civil mi te himna a pawimawh ber a ni," tiin TF1 in an interview naah a sawi.

Russia Foreign Ministry chuan India and Pakistan te sipai chakna hmanga an inep hi an ngai thutak hle an ti a, ram pahnih te chu insum hram hram turin an ngen, Foreign Ministry website-a thu an tichhuahah ram pahnih te hi an thin tha tak an nih thu leh terrorist te chetna hrim hrim erawh an dem tih an tarlang.

Japan Chief cabinet Secretary Yoshima Hayashi chuan, "Kashmir-a April 22-a terrorist te chetna khan kan ram chuan kan dem tak zet a ni. Thil awm thei chu, he thil thleng hi kan ngai thutak tih kan sawi duh a, hei hian thil phuba lak duhna nasa zawk a thlen thei a, sipai inbeihna lian zawk pawh thleng thei a ni. South Asia-a remna leh muanna a awm theih nan hian India leh Pakistan te chu insum theihna kalpui a, inbiakna hmangin he thil hi chingfel se tih hi kan ngenna a ni," a ti.

UAE Foreign Minister leh Deputy Prime Minister Abdullah bin Zayed bin Sultan Al Nahyan chuan India leh Pakistan te chu insum hram hram turin a ti a, thil tha lo zawk a thlen loh nan an thinrimna te beng dai turin a ngen.

Qatar Foreign Ministry chuan, "Ngun takin India leh Pakistan buaina hi kan lo thlir reng a, he buaina hi thu hmanga chinfel thuai a tha. Ministry of Foreign Affairs chuan India leh Pakistan te hian hmanhmawh takin inbiakna nei se tih chu a duhdan a ni," tiin.