ZALEN July 31, 2026: Vawiin khan Mizo Hnam Runah chhung inkhawm neih a ni a, Mizo National Women Front (MNWF) pualin hun hman a ni. thusawitu MNF Legal Board Treasurer Zothansangi Hmar, Advocate chuan Mizo naupangte khawvela naupang smart ber bera siam turin Mizo hmeichhia te an pawimawh thu a sawi.

 Zothansangi Hmar chuan, "Social media-in mi a chiah hneh em em a. Social media hman dan naupangte pawh kan zirtir a, kan kaihhruai a pawimawh hle a. Khawvela ram hlim ber leh smart ber tia hriat lar Finland ramah hian naupan tet atanga social media hman thiam dan inzirtirna hi an school subject 1-ah an nei daih tawh a. Hetah hian napangte chu fake news thliar thiam dan te, mi troll-tu nih ropui loh zia te, practical work hmangin an zirtir a. 

Hetiang chiah hian Mizo naupangte hi social media hman dante kan zirtir a pawimawh hle. Naupangte hi nakina ram hruaitu leh enkawltu an la nih dawn avangin keini hmeichhiate hian In lama kan bula awm naupangte theuhah pawh theih tawp kan chhuah a, ṭan kan lak tlan a ngai a. Khawvela naupang smart ber ber enkawl chhuak turin Mizo hmeichhiate kan pawimawh a ni," a ti. 

Zothani chuan, "Hmeichhiate hi khawngaihna, hmangaihna leh hriatthiamna nena thutlukna siam thin kan nih avang hian ram rorelnaah te, politics-ah te thuk zawka kan tel a ngai a ni," a ti a. "Mizo hmeichhia chhuanawm tak tak lo awm tawhte sulhnu leh an hniakhnung zui turin ṭhangtharte hi kan ṭan zel a ngai a ni," a ti bawk.

Zothansangi chuan, "Tunah khawvel changkannain mitin leh ram tin min nghawng chho zel a. Heng hian awlsamtein ram hrang hrang culture te kan hmu zung zung tawh a, heng global village kan awm mek tawhna karah hian Mizo hnam nun leh identity vawnhim hi keini Mizote hian kan tih tur pawimawh tak a ni a. Mizo culture leh kan khawtlang nun a kum tam kan lo tih thin dan tun thlenga la chhawm zel tlak tam tak te hi kan vawnnun chhoh reng hi kan tih tur pawimawh tak a ni," a ti. 

Chhung inkhawm hi MNWF Vice President Vanlalrengpuii'n a kaihruai a, Adviser Romawi'in hunserh a hmang.