ZALEN, June 11, 2025: Mizoram Volleyball Association (MVA) chuan tun hnaia Mizoram chhunga ruah sur nasa avanga chhiatna thlenga harsatna tawkte pualin Charity Volleyball Match & Show a buatsaih dawn.

June 20, 2025 zan dar 07:45-ah LPS Arena, Falkland, Aizawlah he hun hi hman tur niin Mizorama volleyball player tha ber ber awmna club pahnih, Thutak Nunpuitu Team (TNT) leh Tuichangral Volleyball Club an inkhel ang. 

Inkhel bakah hian show-ah zai thiam hriat hlawh tak tak an zai dawn bakah lâm thiam leh model rualte an inlan dawn a, Mizo lemchang thiam eng emaw zat inlan tura beisei a ni bawk.

May 24, 2025 atanga Thawhlehni thlenga ruah surah Mizoram pumah lei min hmun 771-ah a awm niin State Emergency Operation Centre (SEOC) chuan a chhinchhiah a. Lei min leh ruah sur nasa tak avang hian mi panga thi an awm tawh bawk nia chhinchhiah a ni.

MVA chuan an Mizopuiten hetiang chhiatna nasa an tawk hi pawi a tiin a tawrhpui tak zet a. Khuarel chhiatna avanga harsatna tawkte puihna tura an ruahmanna hi mipuiten thlawpa pawisa thawhkhawm tur leh ticket leisak turin a sawm.

Nikuma Cyclone Remal-in Mizoram a nuaia chhiatna nasa tak a thlen tum pawh khan Mizo volleyball player tha rualte hi Mizoram Volleyball Lovers (MVL) buatsaiha pen chhuakin charity match an lo khel tawh bawk.

Kumina khuarel chhiatna thleng tuartute tan hian Inrinni zan khan LPS Vision Production leh Youth Icon 2024 Top 10 chuan LPS Studio-ah charity concert huaihawtin mipuiten Rs nuai 6 chuang an thawh khawm a ni.