ZALEN April 15, 2026 : Mizo National Front (MNF) chuan ZPM sawrkarin MUHCS a kalpui mek danah thup ruk a tam a, mi nawlpui ban phak loh anih avangin siam tha thuai se an ti a, inziahluh man a san avangin Kohhran hote hialin an kohhran mi leh sa, inziah luhna nei lo te pui an inhuam thu an auchhuahpui hial a ni, an ti.

MNF Gen. Hqrs. General Secretary Dr. Lalrinzuali chuan, "Health scheme engmah nei ve lo, a mamawhtu tak tak, contributory beneficiaries inziaklut an tlem em chhan hi inziah luh man a san vang a ni a, a hniam ber pawh Rs. 2,500 chawi ngai a nih avangin mipui nawlpui ban phak a ni lo va, Kohhran hote hialin an kohhran mi leh sa, inziah luhna nei lote puih an inhuam thu an auchhuahpui hial hi MUHCS hlawhchham zia lanna, sawrkar tan thil zahthlak tak a ni," a ti.

"Hetihlaia 'Kohhran hote pawhin tha min tih pui' ti zawnga sawrkar hotuten mipui hmaa an sawi duh maite phei hi chu mi harsa zawkte dinhmun an hriatpui phak loh zia lanna leh, mirethei zawkte hmusiatna lam a hawi zawk a ni," a ti bawk.