ZALEN September 5, 2026: Kolasib district-ah draft roll tarchhuah aiin final roll tarchhuah turah voters 1397 in an tlem zawk.

Final roll tlangzarh tur chungchang thlirin Zirtawpni khan DC Conference Hall-ah meeting neih a ni a, July ni 4,2026-a draft roll tlangzarh tak nena khaikhin chuan Kolasib district chhunga final electoral roll thar turah hian voter 1,397 an tlem zawk dawn. He huna tarlan a nih danin draft roll tlangzarh takah khan Kolasib district-ah voter 61,340 an awm a, tuna final roll tlangzarh turah hian voter 59,943 chauh an awm tawh dawn. 

Tuirial bialah mi 99 paihin voter 17,620 an awm tawh dawn a, Kolasib bialah pawh mi 467 paihin final roll-ah hian voter 22,485 an ni tawh ang. Mi 831 paihna Serlui bialah pawh voter 19,838 an awm tawh dawn a ni. Election Officer Chinlianmanga chuan electoral roll thar turah voter tlem zawk chhan hi sawiin, "Tuna electoral roll thar tlangzarh turah hian draft roll aia voter kan tlemna chhan hrang hrang a awm a, no mapping te, discripancies te bakah double entry te, foreigner avang te, state danga vote nei te paih a nih tak hnuah final figure-ah hian kan tlem ta a ni," a ti. 

Naktuk September ni 7,2026 hian final roll hi tlangzarh a ni dawn a, tlangzarh atanga ni 15 chhungin DEO hnenah appeal theih a ni dawn a ni. Election Commission of India in ruahmanna a siam hmasakah chuan vawiin Pathianni hi roll tlangzarh hun tur a ni a, mahse sawn tura an dil angin ECI chuan sawnin naktukah tlangzarh a ni dawn ta a ni. Roll tlangzarh chungchangah hian naktuk chhun dar 12 hian Chief Electoral Officer Garima Gupta chuan Aijal Club-ah chanchinbumite kawm a tum.