ZALEN February 9, 2026 : ZPM chuan vawiin khan an Party Office-ah chhung inkhawm an hmang a, he huna thusawitu Home Minister K. Sapdanga chuan sawrkar kumtharah police 200 an lak leh tur thu a sawi a, Kuhva tawlhruk-a inhnamhnawih chu service lai an ni emaw, civil mi pawh ni se an dim loh tur thu a sawi bawk.

K. Sapdanga chuan, “Kum 2021 atangin kum tin Police boral za chuang an awm thin a, kum tin mi 150 vel bawr pension awm ziah bawk. Post ruak 4,666 a awm ta mek a, tunah hian training mek 250 an awm a, financial year tharah police 200 lak leh tum a ni. A hmaa Police kan lak dan ang bawk khan dik takin kan la leh dawn a, thalaite lo inring rawh u.”

“Kum 2025 kha Police-te chuan fitness uar kumah kan hmang a, kum 2026 hi discipline uar kumah kan puang ve leh thung. Police-ah chuan posting duhna hmun dil a awm ve lova, a hun takah leh a hmun dik takah engkim tih vek tum a ni,” a ti.

K. Sapdanga chuan, “ZPM chuan Kuhva Smuggling kan do a, eptuten min do ve thung hi a pawi hle. Politician inrawlhte mipuiin an hnawl a, Police inrawlhte pawh an pension zel a ni. Kum hnih chhungin Hachhek bialin a rah an tel a, chu chu ram mipuiten kan hria a ni. Kan sawrkar chuan kuhva smuggling hi kan khap zel dawn a, Service lai an ni emaw, civil mi an ni emaw, inhnamhnawih an awm chuan kan dim dawn lo,” a ti. 

Home Minister chuan, “Ruihhlo ngaite nasa zawka kan buaipui a ngai a, YMA kumpuan ‘ruihhlo do’ hi a fuhin a hun a dik tak zet a ni. Aizawlah ruihhlo ngai/ngawlvei an tam a, mi sing chuang zet an tling tawh a, zanah phei chuan hmeichhe tan mai ni lo, mipa tan pawh lenchhuah a him lo. Home leh Excise department bakah YMA-te nena Operation Jeriko chak zawka kalpui tum a ni a, Hulhliap Short Stay, TBCC leh Operation Kingdom Ministry-te hi an hlu tak zet a ni,” a ti.