ZALEN May 3, 2026: Mizoramah tun hnai kum 12 chhungin zu vanga thi chhinchhiah mi 305 an awm a. Hetihlai hian Aizawl dai hnaia zute laboratory-a endik chu a result ngaihchan mek zel a la ni.

Excise & Narcotics department (END) tar lan danin, kum 2014 atanga kum 2025 inkar chhunga zu vanga thi chhinchhiahte hi mipa 261 leh hmeichhia 44 an ni.

Hemi hun chhung hian Aizawl district-ah zu vanga thi chhinchhiah mi 33 (mipa 26 leh hmeichhia pasarih) an awm a, Lunglei district-ah mi pasarih (mipa vek), Siaha district-ah pakhat (mipa), Champhai district-ah 62 (mipa 49 leh hmeichhia 13), Kolasib district-ah 136 (mipa 119 leh hmeichhia 17) an awm a. Kolasib district hi zu vanga thi awm tamna ber district an ni.

Serchhip district-ah kum 2014 atanga 2025 inkar chhungin zu vanga thi chhinchhiah mi 57 (mipa 52 leh hmeichhia panga) awm bawkin, Mamit district-ah mi pasarih (mipa panga leh hmeichhia pahnih), Lawngtlai district-ah mi pahnih (mipa ve ve) an awm a. Hnahthial, Khawzawl leh Saitual district-ah hemi hun chhung hian zu vanga thi chhinchhiah an awm lo.

END hotute hnen atanga ZALEN thudawn danin nikum lam khan Aizawl dai hnai, Rangvamual, Phunchawng leh Tuikhurhlua zute chu Delhi-a central laboratory-ah vawi thum endiktir a ni a, vawi thum an endiktirna result hi ngaihchan mek a ni.

Hetihlai hian zu an endiktirna result hi laboratory lamin an tidik hlei thei lo a, hemi vang hian test result hi zuzi thei dinhmunah a ding.

Rangvamual, Phunchawng leh Tuikhurhlua zu siam chhuah rakzute hi mihring hriselna atana a hlauhawm dan hriat chian a nih theih nan Delhi-a central laboratory-ah endiktir a ni tawh a, tum hnih endiktirin result pawh an dawng tawh a, heng test neihah hian tum khatah a quality a chhe hle a, tum khat dangah a chhe lem lo thung.

A quality a inthlauh em avangin a tum thumna atan endiktir nawn leh a ni.