ZALEN August 24, 2026: Mizo Hnam Runah chhung inkhawm chu vawiin khan neih a ni a. Treasurer Lalruatkima chuan thusawiin, "Mipui phurrit tam tak ZPM-in a siamte chhawk zangkai tur leh Mizo nationalism chawi nung turin MNF kan inbuatsaih a ni," a ti. Kum 2028 inthlanah MNF chu mipui beisei ber party anih avangin insiamthat ngaite insiam tha zelin, mipui beiseina ti hlawhtling tura an inbuatsaih thu a sawi bawk.

Ruatkima chuan MNF-in zalenna a sual chhan sawiin, "Kan hnam, kan ram, kan sakhua a him nan leh zalenna sang ber kan neih theih nan MNF chuan zalenna a sual a. Kan hnam pasalṭha leh martar-te avangin hnam zahawmah kan chhuak a ni," a ti a. "Nationalism tel lo a Mizo hnam leh Mizoram kaihhruai hi a pawi thei a ni. Tunhnai Shillong buaina pawh a ram neituten ram leh hnam humhimna kawnga an tlai vanga thleng a ni. Kum 1966 a thlarau kan chan ang, ram leh hnam hmangaihna khan ṭhalaite thinlungah thusawi leh rawh se," a ti bawk.

"Remna thuthlung in a ken tel Article 371G in a huam FCA Act, 2023 ZPM sawrkarin a adopt a, halral thil hlana an hlan ta mai hi a pawi em em a, ṭhangtharte hian ZPM sawrkar hi an la rawn dem ang. Remna thuthlung bawhchhiatna a ni a, remna thuthlung bawhchhe hmasa ber sawrkar an ni. An inhmuh chhuah hunah meuh chuan a tlai tawh ang," Ruatkima chuan a ti a. "Remna thuthlung Chief Minister-in a sawi bawrhbangte hi a pawi hle. Remna duh avanga IPS bang niin a insawi thin a, 'remna thuthlung point tinah ka tel' tituin enga tinge a sawi bawrhban leh si? Uiin a luak hnu a ei leh, tih ang chauh a ni," a ti bawk.  

RD Minister hlui chuan,"MNF sawrkar lai khan Covid-19 hripui karah pawh ni 100 inhlawhnaah hian mipuite ni 100-ah ni 100 an inhlawh thei a. A thawktute hlawh pawh lak theih loh a awm lo mai ni lovin, 2024 March thla thlenga an hlawh tur kan ti fel sa a ni. Ni 100 inhlawhnaa thawktuten ZPM sawrkar hnuaiah hlawh an la ṭha lo hle a. Thla 3 te, thla 5 te hlawh an la lo fo a. Thawktute an buaiin an lainat awm tak zet a ni. MNF sawrkar an ngai ngawih ngawih a ni," a ti bawk.  

"ZPM sawrkar hnuaiah mipuite phurrit Buhfai man a let a tih to te, School upgradation tawh hnuhhniam leh te, Electric smart meter kalphung ennawn te a tul dawn a ni," a ti bawk.