ZALEN January 11, 2026: Nikum 2025 khan Mizoramah ruihhlo hman sual vangin mi 118 an thi a, kum 21 chhunga ruihhlo vanga thi tam ber kum a ni.

Excise & Narcotics department chhinchhiah danin nikum khan Mizoramah ruihhlo hmansual vangin mipa 100 leh hmeichhia 18 an thi a, mitthi te hi kum 17 atanga 57 inkar vek an ni. Excise & Narcotics department chhinchhiah danin kum 1984 atang khan ruihhlo hmansual vanga boral hi Mizoramah an awm tan a, kum 1984 atanga December 31, 2025 thleng khan ruihhlo vang hian mi 1,997 an thi tawh a, heng zinga 1,753 hi mipa niin hmeichhia 244 an awm bawk. 

Ruihhlo ti thinte thihpui tam ber chu proxyvon/ parvon spas a ni a, mi 1161 in an thihpui a. Heroin chu damdawi mala thihpui tam pahnihna niin mi 307 an thi a, a dang 529 hi heroin leh thil dang tihpawlh te an ni a. Chhinchhiah danin ruihhlo vanga thi te hi kum 14 atanga 58 inkar vek an ni.

Mizoramah ruihhlo vanga thi an tam ber kum chu kum 2004 kha niin hemi kum hian ruihhlo hmansual vang hian mi 143 an thi a, kum 2000-ah 139, kum 2003-ah 136 leh kum 2001-ah 101 thi chu an tam kum a ni a. Hemi hnu atang hi chuan ruihhlo vanga thi hi 100 chuang an awm tawh lo char char a, hemi hnua ruihhlo vanga thi an tam ber kum chu nikum kha a ni a. Chhinchiah danin kum 1986 khan ruihhlo vanga thi an awm lo.

Ruihhlo ngaite thihpui tam ber ni thin proxyvon/parvon spas hi sawrkar laipuiin a khap tak avangin kum 2017 atang kha chuan thihpui an awm tawh lo nia chhinchhiah a ni.