ZALEN April 26, 2026: Nikum April atanga kumin March thleng khan Mizorama blood bank hrang hrangah thisen unit 36,152 lak a ni a, unit 33,690 hi mi tlawmngaite pek niin pek bik awm lo (voluntary)-a pek zat hi 93% a tling.

Mizoram State AIDS Control Society (MSACS) chhinchhiah danin kum kalta chhung khan Mizorama blood bank 12-ah thisen hi pek vek a ni a, unit 2,462 chauh hi tum bik neia pek a ni.

Mizorama blood bank zingah Civil Hospital, Aizawlah thisen pe tam berin unit 16,945 lak a ni a, ZMC chu pahnihna niin unit 4,993 lak a ni a. Synod Hospital, Durtlangah unit 3,156 lak a ni. 

Blood bank 11 zingah za zela chhutin District Hospital, Mamit chu a thlawna thisen pe tamna ber a ni a, nikuma thisen lak unit 427 zinga 418 chu tih bik nei loa pek a ni a, thisen an lak zawng zawng atanga chhutin 98% a tling.

Nikum khan Mizoram hmun hrang hranga thisen pek rûnpui tum 628 huaihawt niin unit 23,591 lak a ni. 

MSACS chhinchhiah danin April, 2024 leh March, 2025 inkar khan Mizoramah thisen unit 34,752 pek a ni a, unit 32,566 chu pek bik a thlawna pek niin a thlawna thisen pek hi 93.71% a tling a ni.

Kum 2024- 2025 chhung khan blood bank-ten blood donation camp vawi 611 an buatsaih a, unit 22,602 lak a ni. 

ZALEN thudawn danin Covid-19 hunlai khan thisen pek hi a tlahniam thin a, a reh hnuah pe an pung niin an sawi a. Mizoram chu India-a thisen pe tha state zingah a tel nia thudawn a ni.