ZALEN August 16, 2026: Mizoram Police chuan kum ruk kalta, kum 2020 atanga 2025 inkar khan thubuai chi hrang hrang 20,323 an ziak lut a. Heng zinga case 16,076 hi IPC (a hnua BNS tia thlak) hnuaia ziah luh a niin case 4,247 hi Local & Special Law (Non IPC) hnuaia ziah luh an ni.

ZALEN-in Mizoram Police thawktute hnen atanga thu a dawn danin kum ruk kalta chhunga BNS/IPC hnuaia thubuai ziah luh 16,076 zingah hian in rawk/rukruk case chu a tam fal hle a, hemi kaihhnawihah hian thubuai 11,277 ziah luh niin hei hi BNS/IPC hnuaia thubuai ziah luh zawng zawng atanga chhutin 70.14% a tling pha a ni.

In rawk (burglary) case hi kum 6 chhung hian 5346 ziah luh a ni a, rukruk (theft) case hi 5931 ziah a ni bawk. BNS/IPC hnuaia thubuai ziah luh tam zual dang te chu mi bum thubuai 831, mi tihnat/ kut thlak (hurt) thubuai 549 te an ni. Police chhinchhiah danin kum 6 kalta chhung hian tualthah case 154 leh tualthah tum case 98 ziah luh a ni a. Pawngsual thubuai 146 ziah luh a niin thihna thleng lirthei chetsualna (road accident fatal) tum 426 a thleng bawk. Kum 6 kalta chhung hian BNS/IPC hnuaiah kum 2020 kumah thubuai ziah luh tlem berin case 1804 ziah a ni a, kum 2022-ah tam berin case 3699 ziah luh a ni.

Local and Special Law (Non IPC) hnuaiah hian kum 6 chhung khan case 4247 ziah luh a ni a, heng zingah hian zu khapna dan bawhchhiatna chu case ziah luh tam ber niin 1541 ziah a ni a, hei hi Local and Special Law (Non IPC) hnuaia thubuai ziah luh zawng zawng atanga chhutin 36.28% a ni a, pahnihna chu ND&PS Act bawhchhiatna niin case 1405 ziah a niin hei hi thubuai ziah luh atanga chhutin 33.08% a tling bawk. Local and Special Law (Non IPC) hnuaiah hian naupang chunga hleilenna kaihhnawih (POCSO Act bawhchhiatna) thubuai ziah luh pawh a tam hle a, case 756 ziah luh a ni bawk. Local and Special Law (Non IPC) hnuaiah hian kum 6 kalta chhungin kum 2020-ah thubuai ziah luh tlem berin 513 ziah luh a ni a, kum 2025-ah tam berin 852 ziah luh a ni.

Kum 6 kalta chhunga Mizoram Police thubuai ziah luh zat

Kum    IPC/BNS   Spl. Law   Total

2020   1804   513   2317

2021   2486   712   3198   

2022   3699   574   4273

2023   3338   763   4101

2024   2348   833   3181

2025   2401   852   3253

G.Total   16076   4247   20323