ZALEN November 9, 2025: Kum liam ta, 2024 chhung khan Mizoram-ah ruahtui tla a tam hle a, Aizawl bika mm (millimetre) 2,295.9 a tling a. Hetihlai hian kumin January - October chhunga ruah tla chu mm 2,126.0 a tling tawh.

Directorate of Science & Technology atanga ZALEN thudawn danin nikum chhunga ruahtui tla zat hi kum hmasa, 2023 chhunga tla zat aiin a tam hle a. 2023-a mm 1,972.8 tla aiin mm 323.1-in a tam zawk.

Nikum January-ah ruahtui mm 1.8 a tla a, February-ah mm 15.2, March-ah mm 33.8, April-ah mm 87.0, May-ah mm 519 leh June-ah mm 353.7, July-ah mm 35.5, August-ah mm 572.7, September-ah mm 231.6, October-ah mm 82.9, November-ah mm 20.2 leh December-ah mm 19.6 a tla.

Nikuma ruahtui tlak tam ber ni chu May 28 niin mm 205.0 a tla a, data atanga a lan danin hetiang zata tam hi ni khat thil thu-ah ruah a tla zen zen lo.

Kumin January-ah ruah tla a awm lo a, February-ah mm 32.0 tlain March-ah mm 16.4, April-ah mm 61.8, May-ah 718.3, June-ah mm 378.0, July-ah mm 495.3, August-ah mm 456.2, September-ah mm 235.0 leh October-ah mm 133.6 ruahtui a tla a. Kumina tla tawh zawng zawng hi mm 2,126.0 a tling.

State Meteorological Centre, Directorate of Science & Technology-in a chhinchhiah tawh chinah Mizoramah kum 36 chhung (1986 atanga 2021) khan fur laiin (June - September) kum tin ruah mm 1,289.9 sur ang a ni.

Kum 2017 kha fur chhung bika ruahtui tlak tam ber kum niin June - September thla chhungin mm 1,836 a tla a. Kum 2020 kha fur chhung bika ruah tui tlak tlem ber kum a ni a, mm 856.4 chauh ruah a tla.

Aizawl ruah tlak dan

2019  mm 1,518.2

2020  mm 1,741.5

2021  mm 1,917.6

2022  mm 2,015.1

2023  mm 1,972.8

2024  mm 2,295.9  

2025  mm 2,126.0