ZALEN May 24, 2026: Mizoram Agriculture Marketing Board (MAMB)-in Mizorama thar sawhthing lei leh hralhna tura a ruahman, secondary collection centre (SCC)-ah quintal 1,36,985.96 lei/hralh a ni tawh a. Nikuma sawhthing zat erawh a la phak lo hle.

State sawrkarin February 2, 2026 atangin SCC kaltlanga sawhthing lei/hralh hun a hawng a, ruahman dan chuan May 30, 2026-ah a tawp dawn.

MAMB hotute hnen atanga ZALEN thu dawn danin May 14, 2026 thleng khan SCC hrang hrangah sumdawngten kut hnathawktute sawhthing an lei tawh a, qtl 1,36,985 (kg 1,36,98,596.18) lei tawhin Rs 34,40,53,320.14 man a ni.

Sawhthing hi SCC hrang hrangah a man (rate) a inang lo a, sawrkarin a baa lei a phal loh avangin sumdawngte hian a man hi kut hnathawktute hnenah an pe nghal zel a ni.

Nikum chhung khan Mizoram sawrkarin kuthnathawktute sawhthing thar kg. 3,38,35,182 (quintal 3,38,351.82) a lei a, Rs. vbc. 137.72 sen a ni a. Mizoram district hrang hrang zingah Champhai district-ah lei tam berin quintal 82,268.41 lei a ni a, a dawttu, Serchhip district-ah quintal 62,479.23 lei a ni.

Khawzawl district-ah quintal 56,108.17 leh Saitual district-ah quintal 47,546.81 lei a ni a. Siaha district-ah hralh tlem berin quintal 2,922.22 an hralh a, Lawngtlai district-a quintal 3,826.69 hralhin an dawt.

Heng bakah hian Lunglei district-ah quintal 32,941,62, Aizawl district-ah quintal 18,403.33, Hnahthial district-ah quintal 18,090.13, Kolasib district-ah quintal 3,882.69 leh Mamit district-ah quintal 9,882.52 te lei a ni bawk.

Kumin May 14 thlenga sawhthing lei tawh quintal 1,36,985.96 hi nikum a sawhthing lei zat quintal 3,38,351.82 aiin a la tlem hle a, kumin aia nikuma lei zat tamna hi quintal 2,01,365.86 a la tling.