ZALEN, November 11, 2025: Qualifying round paltlang, Mizo zinga pool khel thiam rual 24-te inelna, Ather Electric Scooter 9 Ball Pool Championship 2025 ni hnihnaah Lalsangzela leh R Lalthazuala ten Pool D atangin quarterfinal an lut.

Mizoram Snooker & Billiards Association (MSBA) buatsaih inelna hi Thawhtanni atang khan Millennium Centre Atrium, Aizawlah khelh tan niin a tan niah hian Pool A atangin Lalrina Renthlei leh K. Lallawmkima ten quarterfinal an lo inhawlh thleng tawh.

Thawhlehnniah Pool D-a mite inel ve thungin frame nga la hmasa zawk chak (race to five)-a khelin Thazuala leh Sangzela tlangin Roy Lalhriatpuia, Rosanglura, K Lalngaihawma leh C Lalramluahsanga te an tla thung.

Nilainiah Pool B-a player paruk awmte inel ve thungin a tukah Pool C-a mite an inkhel ve thung ang.

Zirtawpniah quarterfinal khelh a ni ang a, Inrinni chawhmaah semifinal khelin chawhnuah final an khel zui dawn a ni.

Ather Electric Scooter 9 Ball Pool Championship 2025 hi ni tin chawhma dar 10:00 atanga khelh tan a ni a, a hmunah a en theih bakah Aidu Play-ah live-a pek chhuah niin a thlawnin a en theih a ni bawk.

Inelna hi a duh duh tel theih a ni lo va, a hmain MSBA Hall, Hawla Indoor Stadum-ah a khel pha tur zawnna tournament awmin player tha zual 24 chauh an inlan thei a ni.