ZALEN April 14, 2026 : Mizoram Chief Minister hlui Zoramthanga'n ama chanchin a ziahna lehkhabu, "From Guerrilla Fighter to Chief Minister" tih chu vawiin khan Mizoram Larsap, General (Dr) Vijay Kumar Singh, PVSM, AVSM, YSM (Retd) chuan Aijal Club-ah a tlangzarh.

Larsap General (Dr) Vijay Kumar Singh chuan "From Guerrilla Fighter to Chief Minister" tih lehkhabu chu mimal chanchin ziahna mai ni lo, Mizoram history leh politics hriat chian nana tangkai tak, a ziaktu ngei tawnhriat atanga buatsaih, Mizoram hun tawn pawimawh tak chungchang tarlanna a ni.

Lehkhabu chu rambuai lai atanga mipui sawrkar hnuaia mawhphurhna leh hruaitu dinhmun pawimawh tak thlen dan chanchin tarlanna anih tih sawiin, he lehkhabu hian inbiakna, inhriatthiamna leh tumruhna hmangin harsatnate a chin fel theih tih a lantir a ni," a ti. A ziaktu Zoramthanga taimakna fakawm a tih thu sawiin, inzir mi anihna chuan hlawhtlinna tam tak a pek thu leh, tum chuan kawng a awm tih ataka a entir thu a sawi bawk.

Larsap chuan Mizoramin chanchin danglam bik a neih thu sawiin, Zoramthanga lehkhabu ziah chuan Mizorama thil thleng inlumlet dan fiah taka a thailan thu leh, a ziaktuin ama tawnhriat ngeite hmanga thil thlen dante a lo chhinchhiah thlap mai chu fakawm a tih thu sawiin, "Hei hian thangtharte hnenah rambuai awmzia bakah zalenna leh mipui rorelna hlut zia a hriat thiam tir thei dawn a ni, a ti a. Thalai, zirlai, zirbing mi, dan siamtute leh mipuite'n tangkai taka an hman ngei a beisei thu a sawi bawk.

Lehkhabu ziaktu Chief Minister hlui Zoramthanga chuan "From Guerrilla Fighter to Chief Minister" lehkhabu tlangzarh a ni ta chu a tan thil chhinchhiah tlak tak anih thu a sawi a. Lehkhabu a khawr pum dan chanchin tarlangin, kum 50 lai diary tha taka a vawn that chu thu lak nana a hman thu leh lehkhabu chhunga thil thleng a tarlante chu amah ngei a tel vena deuh vek a nih thu a sawi a. Lehkhabu khawr pum anih theih nana buaipuitu zawng zawngte chungah lawmthu sawiin, Mizote mai bakah hnam dangte pawhin Mizo chanchin an hriat chian lehzual nana tangkai taka hman anih ngei a beisei thu a sawi a ni.

Zoramthanga chuan Larsap nena an intawn dan inperhsan tak pawh he hunah hian sawi chhuakin, inhre miah lova December ni 16, 1971 East Pakistan War laia lo inep tawh, khatih laia Indian Army-a Lieutenant, tuna Mizoram Larsap ni ta General (Dr) Vijay Kumar Singh, PVSM, AVSM, YSM (Retd) in India laka zalenna suala lo rammu tawh buatsaih lehkhabu a tlangzarh ta mai chu thil thleng zen zen lo leh mak dangdai tak anih thu a sawi bawk.

He hunah hian Dr. Lalnunkimi Colney-in lehkhabu thlir lawkna ngaihnawm takin a nei a ni.

From Guerrilla Fighter to Chief Minister tih lehkhabu hi Penguin Random House chhuah a ni a. Online-in Amazon-ah a lei theih bakah, tlangzarh anih hnu hian lehkhabu zawrhna dawr hrang hrangah lei theiha chhawpchhuah a ni a. Phek 430 a chhah niin, Bu khat hi Rs 400/- man zel a ni.