ZALEN April 19, 2026 : Bilkhawthlir leh Saiphai inkar kawnga lei pahnih, Sesih leh Chepte lei dawh hna chu a hunah zawh a nih loh avangin PWD chu contractor lakah an lungawi lo hle a. Hetih lai hian contractor hi court lamah kal a tum nia thudawn a ni.

ZALEN-in Kolasib atanga thu a dawn danin Sesih lei hi June 30, 2019 atanga hna tan tur niin December 30, 2020-a zawh tura ruahman a ni a. Lei dawhna hi NABARD RIDF-XXIV sum Rs. 2,81,12,085 ni tura ruahman a ni a, contractor atan M/s Blue Hill Engineering, New Diakkawn chu thlan an ni.

Contractor hian hna a thawh muan avangin zawh hun tura ruahmanah zawh a ni lo a, thawh chhung tur vawi riat pawh seisak a ni tawh a, pawh sei hnuhnung ber chu November 11, 2025 khan a tawp a. NABARD-in sum an sanction theih chhung pawh September 30, 2024 khan a tawp tawh.

Heti chung pawha zawh a la nih loh avangin November 3, 2025 khan Chief Engineer, PWD hovin lei dawh chungchang hi PWD leh contractor ten an sawiho a a, contractor hian hun tiam chhunga hna a zawh theih loh avangin sum hman bâng la awmte hmangin department-in khawih chhunzawm mai tiin an rel a. Meeting hian hna hi la zawh loh ni mah se, zo tawh angin bill siam mai nise, contractor hnenah hian nuai 18.8 atanga nuai 18.9 inkar pek nise, chuta tang chuan contractor hian nuai 13.5 chu department hnenah pe let leh se tiin inremna an ziak niin PWD chuan an sawi.

Sum hi February 13, 2026 khan contractor hnenah pek ni mah se, an inremna angin department hnenah a pe let duh ta lo a. Bill siam dan leh sum la awm zat (balance) a inmil lo a, an hlawk lo tiin a tang leh nia sawi a ni.

Hemi hnu hian meeting pawh koh leh niin contractor hi a kal duh tawh lo a. Hei vang hian PWD pawhin completion certificate an pek tawh chu an cancel leh nia thudawn a ni.

PWD thawktuten lei dawh chungchanga thil awm dan hi Kolasib Sub- Hqrs. YMA hruaitute leh Kolasib chanchinbu mite an hrilhfiah a, Sesih lei bakah Chepte lei pawh M/s Blue Hill Engineering, New Diakkawn dawh tura tih a ni a, hei pawh hi hmalakna a awm loh avangin PWD chuan insawi fiah tura tihna an pe niin an sawi bawk.

Hetih lai hian contractor M/s Blue Hill Engineering neitu, Dr. R. Lalthlamuana chu department thiltih danah lungawi lovin court-ah zualko a tum nia thudawn a ni.