ZALEN July 27, 2026: Gauhati High Court Aizawl Bench chuan Indian Air Force (IAF) in Lengpui Airport tana ram a lei, ram compensation pek chhuah chungchanga Citizen Alliance for Truth and Justice (CATAJ) ten PIL-an thehluh chu vawiin khan an ngaihtuah a, ram neitu dik tak ni lo mi pahnih hnenah zangnadawmna hi eng vanga pe nge an nih leh, eng tianga pe nge an nih chungchang fiahna thehlut turin Mizoram sawrkar a hriattir.

JC Lalnunsanga, Advocate in Record, Supreme court in a tar lan danin, he thubuai hi Justice Michael Zothankhuma leh Justice Budi Habung te thutna Division Bench chuan an ngaihtuah a. IAF-in a ram an lei zau zawng hi a vaiin 110 acres niin, Rs. 1,98,78,55,155 in an lei a. Hei hi zangadawmna dawngtu pakhat Rohmingliana hnenah Rs. 69,99,60,000 pek niin, dawngtu dang Henry Lalremsanga Hlawnmual hnenah Rs. Rs.11,79,02,634 pek a ni bawk.

He ram hi a tirah chuan VC Pass-a neih a ni a, a hnuah LSC-ah chan tirin, May ni 9, 2005 khan mi parukin Rohmingliana hnenah an hralh anga chhinchhiah a ni a; mahse, he hralhna sale deed hi dan ang takin a register lo tih tar lan a ni. LSC neitu dik tak zinga mi pathum K. Lalduha, H.L. Samuel leh Ramfangzauva te chuan he ram an hralh lai hi an hriatpui loh thu leh, an VC Pass chu LSC-a chantir a nih dan pawh an hriatpui loh thu an sawi bawk.

He thubuai Citizen Alliance for Truth and Justice (CATA) and Anr. vs. Union of India & 15 Ors (PIL/3/2026)-ah hian petitioner-te aiawhin Adv. Joseph Lalchhanhima Renthlei a ding a, sawrkar aiawhin Addl. AG Linda L. Fambawl a ding a ni.