ZALEN March 22, 2026 : Mizoramin thlawhna tum hmun a neih awm chhun Lengpui airport cheithat hna chu harsatna a awm loh chuan April 2026 thla laihawl velah zawh hman tum a ni.

ZALEN in Aviation department thawktute hnen atanga thu a dawn danin tun dinhmunah Lengpui airport tlan kawng (run way) chei that hna hi 64% zawh a ni tawh a, ruah sur leh thildang ten a ti buai a nih loh chuan 2026 april chawlhkar hnihna velah zawh tum a ni tih an sawi a. Lengpui tum hmun tlan kawng cheithat hna hi Brahma company, Rajasthan ten an thawk mek a, Mizoram PWD ten an vilpui bawk. Tum kawng siamthatna atan hian Meghalaya atangin lung chang tha bik lakluh a ni.

Thudawn danin Lengpui airport-a thlawhna tlan kawng (run way) hi a that tawk loh avangin Central Road Research Institute chuan siamthat nise tiin rawtna a thlen a, hemi bawhzui hian Mizoram sawrkar chuan Lengpui Airport thlawhna tlan kawng siamthatna tur a ruahman a ni. Thudawn danin Lengpui thlawhna tlan kawng hi a that zawng tehna Pavement Classification Number (PCN) hi 38 a ni mek a, hei hi PCN 55 ah tih san tum a ni. 

Pavement Classification Number a that tawk loh vang hian thlawhna lian pawhin a phurh tawk aia tlem a phur thin a, Airbus ten passenger 180 an phurh theih laiin Lengpui thlawhna tum hmunah hi chuan a phurh theih zat aia tlem (10%) a phurh a ngai thin a. Passenger 180 phur thei pawh 165 chauh te an phur thin nia thudawn a ni. Tun dinhmunah Lengpui tum hmunah hian Indigo leh Alliance Air te an service mek a ni.

Lengpui Airport hi kum 1998 khan Mizoram sawrkar PWD siam a ni a, a tlan kawng chak zawng hi 38 PCN (Pavement Classification Number) chauh a ni a, re-surfacing-te tih tawh thin ni mah se Aviation lama thuneitu sang DGCA chuan duhthu a sam loh thu an lo sawi tawh thin a. Mizoram sawrkar chuan eng tiang taka thawm that ngai nge a nih hre tur leh zirchiang turin CRRI (Central Roads Research Institute) ruai in, tunah hian thlawhtheihna lian chi pawh tum theihna tur, 50 PCN tal ni turin re-surfacing hna hi thawh mek a ni.

Re-surfacing hna thawh nan hian Mizoram sawrkar chuan SASCI atangin cheng vaibelchhe 91 a ruahman a, a thawktu atan Airport lama tawn hriat nei tha, Brahma Infra, Rajasthan rawih an niin, anni hian nikum April, 2025 atang khan hmanraw mamawhte chhek khawmin hma an la tan a. November ni 1, 2025 khan trial run neiin, November ni 10,2026 atang khan re-surfacing hna hi an thawk tan ta a ni.

Runway bitumen layer awm sa, CRRI ten 130 mm tal laih chhuah vek tur an tih chu, tha lehzual turin tunah hian Germany siam Milling Machine hmangin 150mm laih chhuah a ni a, layer hmasa berah Dense Bituminous Macadam (DBM) 65mm a chhah Bituminous Course phah a ni a, DBM layer khatna phah zawh a nih hnuah a chungah glass grid leh SAMI layer phah a ni leh ang a, chumi chungah chuan DBM layer hnihna 65mm a chhah phah leh tur niin a chung berah BC 40mm a chhah phah a ni leh bawk dawn a, a layer pumpui chhah zawng hi 170mm a ni dawn a ni.