ZALEN July 26, 2026: Aizawl City Traffic Police te chuan January atanga June, 2026 inkar chhung khan Aizawl khawpuiah lirthei dan bawhchhia 5388 an man a, dan bawhchhe zinga a tam ber lawr lak chu two wheeler an ni.

Aizawl City Traffic Police chhinchhiah danin lirthei dan bawhchhia an man 5388 zinga 3733 hi two wheeler an ni a, kum chanve chhunga lirthei dan bawhchhia zawng zawng atanga chhutin 69.28% a tling a ni. Lirthei dan bawchhia an man dang te hi LMV - 1125, Taxi - 291, HMV - 184, Bus - 42, MMV - 8 leh a dang 5 te an ni. Lirthei dan bawhchhia an man atanga sum chawi tlingkhawm hi Rs. 60,99,300/- a ni.

Chhinchhiahna atanga a lan danin a hmun lova lirthei dah (no parking) vanga dan bawhchhiatna tam berin lirthei 994 man a ni a. Dan bawhchhiatna dang te chu license nei loa lirthei khalh 387, Helmet khum lova 2wheeler khalh 386, No entry bawhchhia 343, No turning (Phal lohna hmuna kual ru) 240, Air/Noise Pollution 228 leh Wrongside Traffic 221 te an ni.