ZALEN, September 19, 2025: Mizo thu leh hla khawvela mi tam takin an dah san bera chhal ngam, Mafaa Hauhnar (L) lehkhabu, a thuziak hrang hrang la tihchhuah loh dahkhawmna, ‘Riahrûn Remna’ tih chu Zirtawpni chhun khan Tlangnuam, Aizawla an chenna inah C.Lalnunchanga’n a tlang tlangzarh.

‘Riahrûn Remna’ hi kum 2018-a thih hmaa a lehkhabu hnuhnung ber leh Mizo Academy of Letters (MAL)-in Book of the Year 2018-a a thlan, ‘Hringnun hrualhrui’ hnua a kuthnu tihchhuah leh hmasak ber a ni.

Lehkhabu thlir lawktu, Lalrammawia Ngente chuan ‘lehkhabu hlu leh tha tak, a bu hming leh a ziaktu nena inrem thlap’ tiin a sawi a, “A lehkhabu hmasate ang maia ropui, ka hmuh dan phei chuan Mafaa sermon ni maiin ka hria,” tiin ‘Rintei Zunleng’ hmanga Book of the Year chawimawina lo dawng tawh chuan a sawi bawk.

Tlangzarhtu, Taitea chuan lehkhabu hlu tak awm leh tur chu lawmawm a tih thu a sawi a. MAL book of the Year vawi hnih dawng tawh hian a thianpa chu inngaitlawm, thiante zinga a khawharna tilang duh ngai lo, zam tak chunga hlim lui thei reng a nih thu leh chu chu an tluk lohna a nih thu a sawi.

Mafaa lehkhabu thar tlangzarhnaah hian a thian tha leh sawm bik tlem an tel a, lehkhabu thar hi Rs. 300 man niin lehkhabu dawr hrang hrangah zawrh nghal a ni.

Mafaa Hauhnar tia mipuiin an hriat lar, H.Lalrinfela hian a thih hma khan lehkhabu panga - Chawlhna Tuikam (1997), Thlaler Aurawl (2008), Vaihna Vartian (2010), Hlim Ni leh Nuih Lai Ni (2011) leh Hringnun Hrualhrui (2018) a tichhuak hman a. A thih hma thlengin ni tin chanchinbu lian, Vanglainia ‘Thu leh Hla Huang’ neia kar tin ziak thin a ni bawk.

Reality show hrang hrang - Talent Show leh Look Alike Contest-ah celebrity judge niin Comedian Search-ah phei chuan endiktu zinga mi lawm hlawh ber a tling.