ZALEN, Apr. 22, 2025: Mahindra full range dealer Mana Motors chuan pawisa kum tawp, March, 2025 chhungin lirthei ke li nei 187 an hralh a, a hma thla aiin 33-in an hralh tam.

Sumdawn nana hman chi 112 hralh chhuakin hming an chherna, Pikup deuh vek a ni a, chutih laiin truck tê, Veero-in hriat a hlawh tan niin General Manager Ramnghahmawia Ralte (Angtea) chuan a sawi a, Aizawl khawpui leh kawng chepa thil phurh kualna atana tangkai tak hi Rs nuai 7.9 atanga nuai 8.9-a lei theih a ni.

Mi mal hman chi, passenger car 75 an hralh tel a, Bolero, Scorpio, Thar leh XUV7OO bakah ama elpui zingah XUV3XO pawhin ngainat a hlawh sawt viau niin Angtea chuan a sawi.

Company hrang hrangin Rs nuai 7.9 atanga nuai 13.9-a lei theih, XUV3XO ang chi compact SUV tha tak tak an neih hlawm avangin inelna a sang hle tih a sawi tel bawk.

India ramah Mahindra-in combustion engine hmang lirthei leh electric vehicle hralh chhuah kawngah hma a sawn mek laiin Mizoram dealer pawhin hma lam pan zawngin ke an pen a, February, 2025-ah 154 an hralh laiin thla liam taah awmze nei thamin hma an sawn.

Chutih laiin October, 2024-ah Mana Motors-in 195 hralhin thla khat chhunga an hralh tam ber a la ni reng a, September, 2013 khan Bawngkawn, Aizawlah showroom an hawng tan a ni.