ZALEN Feb 6, 2026: Ni 5.2.2026 (Ningani) zan khan Manipur Group YMA ten Inkhawmpui vawi 41-na, Lamka Branch YMA Hall, Hmuia Veng-ah an hmang a. He hun hman puitu Prof. Malsawmliana, General Secretary, Central YMA chuan YMA Kumpuan 'Ruihhlo Do' hawnna hun a hmang. 

Ruihhlo Do chungchangah thusawiin, Central YMA General Secretary chuan, tunhnaiah Operation Jeriko avangin Mizorama ruihhlo luhna kalkawng thenkhat a insawn niin a lang a, hemi chungchangah hian Manipur Group YMA te leh Joint Philanthropic Organisation (JPO) a Zofa hnam hrang hrang tlawmngai pawl te chu Mizorama ruihhlo rawn lut tur dan kawnga theihtawpa tang ve turin a sawm.

Manipur Group huamchhunga Branch YMA te pawh mahni huamchhunga theihtawpa ruihhlo do kawnga ke pen tur leh ruihhlo la ti ve lo te leh naupangte hnenah inzirtirna nasa taka kal pui turin a sawm a. Ruihhlo Do hi YMA leh Sawrkar kuta dah mai lovin Nu leh pa, Kohhran te pawhin kan mawhphurhna a ni a, theihtawpa tan la turin a sawm bawk. 

Manipur Group YMA Inkhawmpui hman pui turin hian Central YMA President R Lalngheta leh Prof. Malsawmliana, General Secretary te hovin CEC member 20 an kal a. Tuiphal Group YMA hruaitute leh Silchar Branch President te an kal bawk. Zaninah R. Lalngheta, President in thu a sawi ang. 

Tun dinhmunah hian Manipur Group YMA ah hian Branch 21 an awm a, member 8876 an awm.

#ZalenNews