ZALEN February 9, 2026 : Home Minister K. Sapdanga chuan March thla chhungin khawkar kawng leh khawchhung kawng a tam thei ang ber siam an tum thu a sawi a, Aizawl khawlai kawng, Kolasib lam leh ATL road siam mek pawh khaw tuihul laia zawh nuama siam hman an tum thu a sawi. 

Vawiina ZPM chhung inkhawma a thusawi-ah K. Sapdanga chuan, “Khaw tuihul chhungin khawkar kawng leh khawchhung kawng a tam thei ang ber siam kan tum a, Kolasib lam changtu NHIDCL-te pawh chak zawka an thawh theih nan nawr leh an ngai a, tlawmngai pawl CYMA pawh an tang em em a, a lawmawm hle a ni. ATL Road siam mek pawh kalpui mek zel a ni a, tute emaw avanga khawl tihchhiatin a tibahlah hret erawh a pawi khawp mai. Heng kawngte hi duh angin zo hman lo mah ila zawh nuam thawkhata siam hman tum a ni," a ti.

Aizawl khawchhung kawng chungchang sawiin, "Aizawl khawlai kawng siam mek chu 62% zawh a ni tawh a, grading tha kan duh avangin duh angin hna a chak thei lo a. Minister, Engineer leh Party headquarters hruaituten zan rei tak tak thleng kawng siam an vil thin hi a lawmawm. Heng zawng zawng hi kumin March thlaah chuan zawhfel hman hram tum a ni,” a ti bawk.

AR ram chhuahsana chhunga kawng sial tum a nih dan sawiin Home Minister chuan, “Vantlang tana tangkaia siam a ni dawn a, a zau thei ang ber hmun hringa siam kan tum a, a zau thei ang ber kawngpui siam kan tum a, kan tualchaina ber Lammual-ah pawh phul thar tha chi phah tum a ni. A ngil thei ang berin Lamlian meter 14-a zau sial tum a ni a, Dak Inpui atanga Saron veng panna kawng meter 7-a zau laih tum a ni. Parking Lot lian, motor sang chuang dah theihna tur te, Convention Centre mi 4,000 chuang lenna tur ruahman mek a ni bawk. Bazar Bungkawn-ah Aizawl Square (Island) siam tum a ni a, Assam Rifle Mandir pawh zau zawka la hekin kawng sial a ni ang a, a chungah Public Park siam tum a ni,” a ti.