ZALEN, Apr. 17, 2025: An khua leh club tana lo beng fo tawh thin, LPS Youth Icon 2024 Lalsangliana (Taitea) chuan Pro Volleyball League 2025 khelh tur handbook a tlangzarh a, he infiamnaa a tuizia sawiin mi wifi pawt rua a en hial thin thu a sawi.

Mizorama volleyball inelna lian ber leh ngaihhlut pawh hlawh ber, Pro Volleyball League 2025 hi April 29 atanga LPS Arena, Falkland, Aizawlah khelh tur niin hemi atana inkaihhruaina, handbook chu Ningani chawhnu khan volleyball player Taitea hian a tlangzarh.

Bawktlang tlangval, an khaw hminga ball lo beng fo tawh thin, Taitea hian volleyball chu a game ngainat leh khelh nasat ber a ni tih sawiin court hla zawk pawh kea lo pan ve tauh tauh tawh thin a nih thu a sawi a. “Ka tuichilh em avangin TV-ah pawh kan thlir nasa a, mi wifi pawt ru hialin national leh international match kan lo en ve thin,” a ti.

Tunah a dinhmunah khelhna hun nei tam tawh lo mah se a game ngaihthlut ber a la ni reng tih a sawi.

Zai lama tun laia Mizote zinga hriat hlawh ber zinga mi ni mek, Taitea hi Youth Icon 2024-a thlan a nih hnua miin an kawmna hrang hrangah volleyball a khelh nasat thu hi a sawi tawh thin a. An khaw hming bakah club-ah pawh khelin lehkha an zir lai pawhin college tan pawh a khelh tawh thin thu a sawi.

Mizoram Volleyball Association (MVA) chuan Pro Volleyball League Handbook tlangzarh hi a ngai urhsun hle thin a, league khelh chhung zawnga inkaihhruaina leh dan leh hraite ziahna niin tun hma lamah pawh mi lar leh hruaitu lawk tak takten an lo tlangzarh tawh.

Hawla Indoor Stadium Conference Hall-a handbook tlangzarh inkhawm hi Donald Khawlhring, Vice President, MVA-in kaihruaiin H. Vanlalngura, Treasurer, MVA & Chairman, Technical Committee-in handbook report a pe a. Dr. Lalmalsawma Nghaka, President, MVA-in thu a sawi bawk.

Tlangzarh zawhah hian Technical Committee kaihhruaiin manager’s meeting neih zui a ni bawk.

Mipa team ruk leh hmeichhe team thum inelna tur, Pro Volleyball League vawi riatna hi May 23-ah hmeichhe inelna final-in a tuk, May 24-ah mipa inelnaa hmawrbawk a ni dawn a. Zan dar 8 atang vekin inkhel vawi 22, mipa tum 18 leh hmeichhia vawi li a awm dawn a ni.