ZALEN, June 19, 2025: Mizoram State Sports Council (MSSC)-in kum 50 a tlin lawmna atan leh Mizoram aiawha India ram pum inelnaa tel tur zawnna atan Mizoram Cycling Association (MiCA) chuan July 1 hian Thenzawla AH&Vety Farm-ah thirsakawr intlansiak, Mizoram XCO 2025 a buatsaih dawn.

Inelna hi chi thum - Elite (Open), Junior (kum 19 hnuai lam) leh Masters (kum 40 chung lam)-a then a ni dawn a, an tlankawng hi kilometre 3.5-a thui a ni dawn a. Tlan kawngah hian kawng diak leh nâl bakah lei thil leh pâtêk awmna, chhuk leh chho, kawi bung nghutah te an tlan dawn ni.

Tlan kawng hi vawi nga Junior & Master-a inelnten vawi nga leh Elite huangah vawi riat hel kual tura ruahman a ni a, hei hi khaw awm danin a zir loh chuan tihdanglam a ni thung ang.

Lawmman pawh tha tawk tak siam tur niin Elite-ah hian pakhatnain Rs. 20,000, pahnihnain Rs. 10,000 leh pathumnain Rs. 7,000 an dawng dawn a. Junior leh Masters-ah pawh pakhatnain Rs. 10,000, pahnihnain Rs. 7,000 leh pathumnain Rs. 5,000 an dawng ang a. Medal leh certificate hlan an ni bawk ang.

Category tina champion-te hi Champion’s Jersey hlan an ni dawn bawk a. Hei bakah hian MiCA-in a thawhpui, cycling thawmhnaw leh bungraw siamtu company lian, NAC Cycling-in category tina medal late dawn tur Hamper Prize a ruahman a, intihsiaka tel zawng zawngte hnenah NAC kutchhuak 25%-a tlawma lei theihna discount voucher an pe dawn bawk.

Palina leh pangana hnenah consolation prize Rs. 1,000 leh a tel zawng zawngte hnenah participation certificate hlan an ni ang.

Kumin hi Mizoram sorkar hnuaia sports khaikhawmtu, MSSC-in kum 50 a tlin kum niin a lawmna chi khat atan an hnuaia association tinte chu ram pum huap inelna buatsaih tura a beisei angin MiCA pawhin Mizoram XCO 2025 hi a buatsaih dawn a ni.