ZALEN Febuary 2, 2026: ZPM Vice President C. Lalnunnema chuan, “Lalna leh thuneih duhna avanga a dik a dawk pawh thlu lova midang sawichhiat tur leh puhmawh tur zawn chiam chiam hi a tha lo a. Chutiang politics chu ramhlui zia a ni a, keini ZPM te chuan Mizoram-ah Politics khelh dan thianghlim lantir kan tum ngar ngar a, harsatna karah hma pawh kan sawn a ni,” a ti.

Vawiina an Party chhung inkhawmah C. Lalnunnema chuan, “Ringtu tihawm renga mawi, Kohhran zia lantir zel hi kan tum a. Mi fel awmkhawm kan ni bik lo chung hian Mizoram Politics kalphung chu nasa takin kan siamtha tawhin a lang. Opposition party-te politics khelh dan erawh kan siamthatsak thei rih lo hi a pawi a ni. Dawt sawite, thlalak siamchawp hmanga dawta CM beih te, A dik zawk awm renga a dik lo zawk thehdarh chiam chiam te, hmasawnna rotling siam tum aia vote zawn nana sem policy te, ram leh hnam tana hlawkna tur awm si lova buaina cho chhuak zawnga mipui fuihpawrh te hi Party dangte hian an la sim thei lo hi a pawi em em a ni,” a ti.

ZPM Vice President chuan, "ZPM hi Pathianin min hruai, Ram leh Hnam tana tihsual nei lovin kum 2 chhung ro a rel ta a. Hemi chhung hian sawrkar kaltlangin kan ram hian Pathian malsawmna tam tak kan dawng a. Kan Policy ang takin thlai thar lei te, Power-a intodelh te, Mipui healthcare te, Kawngpui tha leh tlo siam te, Education Policy te, Administrative reforms leh Financial reforms te bakah thil tam tak kan ti tawh a. Hmachhawp tam tak a kal mek bawk a ni.

C. Lalnunnema chuan, "Kan sawrkar hnua thil thleng tam tak han thlir hian ZPM party hian Pathian malsawm ram rim a nam a. Thil tha kan tih zel chuan heng lo pawh hi kan tuh rah leh tuh loh rah tam tak hi Mizoram tan hian kan la seng zel dawn a. Kum 2028-ah pawh Pathian khawngaihna chuan min sawrkar nawntir leh ngei ang tih hi thil beiseiawm tak a ni. Kan khingpuite hian dawt leh thu puarpawleng hmanga min beihnaah hian zam tur kan ni lo va. Huai takin kan ram leh hnam tan hmalam panin kan kal zel dawn a ni," a ti bawk.