ZALEN July 24, 2026 : Mizoram Govt. Adhoc-Aided High School Teacher’s Association (MIGAHTA) te chuan a ni 4 nan sawrkara provincialised an phut tih hlawhtlin anih theih nan leh dinhmun hniam zawka dahna tur Rules thar, The Mizoram Education (Lumpsum Grants-in-Aid for General Maintenance of Private School) Rules, duh loh lantir nan No teaching Day/ Pen down strike neiin lungawilohna an lantir chhunzawm. 

Lungawilohna hi Mizoram puma Adhoc-Aided High School 90 chuanga thawktute chuan an lan tir a; July 27 & 28, 2026 hian an lungawilohna leh an thil phut tihhlawhtlin a nih theih nan Mass Casual Leave lak an tum. Mass Casual Leave lak avanga a nghawng tur zirlaite leh mipuite hriatthiamna an dil rualin an thlawpna pawh an ngen nghal bawk.

MIGAHTA chuan Adhoc High School te hi kum 30 kaltaa khawtlangin harsatna tam tak kara an lo din, Lump sum atanga Provincialise pawh ni vek tawh, chumi hnua ho lam taka provincialise atanga paih thlak leh te an ni, an ti. 

Provincialise an nihna paih thlak an nih mai pawh duh tawk lova, tuna an dinhmun ai pawha hniam zawk, Lumpsum Grant-in-Aid dinhmuna dah hniam tumna awm leh zel hi an duh lovin an dodal a; sawrkar hian an dinhmunte hrethiam tur leh an zavaia Provincialise leh vek turin sawrkar khawngaihna dilin an ngen a ni. 

Sawrkara an thil phutte a hlawhtlin theihna tura an hmalaknaah hun engemawti chhung chu zirna a khaihlak a nih pawhin a tuar tu zirlaite leh nu leh pa, khawtlang hriatthiamna an ngen a. Heng an hmalaknate hi khawtlang school dinhmun tlahniam tur venna leh thangthar hna zawng mekte hmakhua a ni tih hriatsa turin an ngen bawk.